November thla tir, Inrinni leh Pathianni khan European top 5 league khel chhunzawm a ni a. Kar tawp football hnuhma langsar zual kan tarlang leh ang.
English Premier League
Inrinni zan khan Manchester United chuan minute 90+1 a Bruno Fernandes goal thun hmangin Fulham an hneh. United hi Fulham mual Craven Cottage-ah vawi sarih an chak zawn tawh a, EPL club zingah Mimuala an hneh zawn ngun ber dawttu a ni a. United in an hneh zawn ngun ber chu West Brom a ni a. West Brom hi an tualzawlah ngat vawi riat an hneh zawn tawh.
United hian season kal meka minute 75 hnu lamah hmahruaina goal vawi nga an thun tawh a, minute 75 hnu lamah hmahruaina goal thun hnem ber an ni mek.
Season kal mekah tlawm nei lova kal tluang mek Arsenal chu Newcastle United hneh lovin an tlawm a. Thawhtan zan khan Tottenham pawh Chelsea lakah 4-1 in an tlawm ve bawk. Ti hian EPL season kal mekah tlawm nei lo club an awm tawh lo. Arsenal hian season kal mekah goal an thun thei viau a, khelh 16 chhung goal an thun zawn tawhna chu Newcastle United in an tihtawpsak fel ta bawk.
Inrinni zan khan Manchester City chuan 6-1 ngawtin AFC Bournemouth an sawp. City hian khelh 13 chhung ngawt Bournemouth hi an hneh zawn tawh a, EPL club zinga record an neih thatna ber a ni.
City in Bournemouth an sawp tum hian kum 21 mi Jeremy Doku chu goal ngaah ngawt a inrawlh a, Doku hi Haaland hnu lamah EPL khelh khatah goal a inrawlh tam ber thar a ni.
Spanish LaLiga
Pathianni zan khan Real Madrid leh an mikhual Rayo Vallecano te chu goal awm lovin an inhnehtawk. An mualah an chak zawh loh vangin Real Madrid in an hmahruaina an hloh a, khelh 14 chhung ngawt goal an thun zawn tawh chu a tawp fel ta bawk.
Goal awm lova Real Madrid inhnehtawkpuitu Rayo Vallecano khan season kal mekah tlawm nei lovin vawi riat chhung ngawt an kal tluang ta a, hei hi La Liga chanchina an chetthat ber tum a ni a. Real Madrid khelmualah vawi 11 zet an tlawm zawn tawhna an titawp ta chiah bawk.
Inrinni zan khan Las Palmas chuan 2-1 in Atletico Madrid an hneh nawlh a. Kum 1986-87 hnu lamah LaLiga-a Atletico Madrid an hneh hmasak ber a ni a, Atletico Madrid lakah vawi riat an tlawm zawn tawhna an titawp fel bawk.
Goal thun thei tak ni thin Robert Lewandowski chuan Barcelona tan a khelh hnuhnun game ngaah goal a thun ta lo va, goal a thun loh rei zawng hi minute 247 niin, October 2016 hnu lamah goal thun lova hun a hman rei zawn ber tum hun tha lo a tawng mek.
Pathianni zanah Athletic Club in 3-2 a Villarreal an hneh tumin Oihan Sancet chuan goal hnih a siamchhuak a, unau Inaki Williams leh Nico Williams te goal thun tur a assist. Goal hnih siamchhuaktu Oihan Sancet hi La Liga game khatah unau goal thun tur siamsak ve ve thei hmasa ber a ni.
Italian Serie A
Chelsea ah hmun chang phak lo mah se Romelu Lukaku chu Roma tan a vul a, goal a khun chhunzawm zel. Lukaku hian Pathianni zan khan Lecce an hnehna goal a thun. Lukaku hian Roma tan a khelh hmasak game kuaah goal 6 lai a thun a. Roma tan khelh hmasak goal kuaa goal thun hnem ber dawttu niin, amah aia goal thun tam zawl chu goal a thun theih em vanga ‘Batigol’ an tih hial
Gabriel Batistuta a ni a. Argentina forward ropui hian Roma tan a khelh hmasak game kua atangin goal 10 a thun.
Inrinni zan khan club lian AC Milan chu an mikhual Udinese lakah si khat faiin an tlawm a, September 2012 hnu lamah a vawi khat nan khelh hnih chhung goal thun lovin an tlawm zawnna hun chhia an tawng.
German Bundesliga
Bayern Munich tan Harry Kane a vul zui zel. Inrinni zanah si li fai ngawta an elpui lian Borussia Dortmund an hneh tumin Kane hian hattrick a siam. Germany-a club lian pahnih Bayern Munich leh Borussia Dortmund inhmachhawna (Klassiker) vawi khat inlanna hattrick siam thei hmasa ber a ni. Kane hian Bundesliga-ah a zawnin hattrick a siam ta a, Bundesliga-ah a zawna hattrick siam thei 10-na a ni a. Bayern Munich player zingah a zawna hattrick siam thei pathumna niin Makaay leh Mario Gomez te hnung a zui
England captain Harry Kane hian Budesliga a khelh hmasak 10-ah goal 15 zet a thun tling der tawh a, hei hi Bayern Munich record thar a ni nghe nghe. Hei mai hi a ni lo Bundesliga game hmasa 10-a goal 13 thun a, kum 60 chhung zet record lo vawng tawhtu Klaus Matischak (Schalke) record chu Kane hian a thaichhe tel bawk.
Bayern Munich hi an tualchhunga an elpui lian Dortmund lakah inelna hrang hranga khelh 11 chhung zet tlawm nei lovin an kaltluang ta a, hei hi Klassiker record an neih that ber a ni. (Klassiker hi Bayern Munich leh Borussia Dortmund in hmachhawn sawina a ni a. Real Madrid leh Barcelona inhmachhawn sawi nana ‘El Clasico’ hman ang hi a ni) Bundesliga bikah Klassiker-ah game 10 chhung tlawm an nei lo zawn tawh bawk a, hei hi Bundesliga-a Klassiker-ah tlawm nei lova an kal tluan rei pahnih a ni.
Xabi Alonso enkawl Bayer Leverkusen chuan Bundesliga goal hmasa 10 atangin point 28 lai an hmu a. Hei hi Bundesliga game hmasa 10-a point hmu tam ber dawttu niin, kum 2015-16 ah game hmasa 10-a point 30 hmu thei Bayern Munich record an la thaichhe thei lo.
Messi-Ronaldo
A vawi riatna atana Ballon d’Or dawng hlim Lionel Messi chuan chawlh a hmang chhunzawm a. Hetihlai hian Cristiano Ronaldo chuan Al Nassr tan goal thun chhunzawm in, Saudi Pro-League-ah top scorer a nihna a vawnghim zui zel thung.