Kar liam ta Zirtawp zan atang khan Tualchhung League lian panga ten 2023-24 season an khel chhunzawm a. Saudi Pro-League leh Major League Soccer (MLS) khelh chhunzawm a ni bawk. Kartawpa tualchhung league hrang hranga thil thleng langsar zual tarlanin, khaihawmna kan nei ang.
Premier League
Champion lai Manchester City chuan Pathianni zan khan Sheffield United chu 2-1 in an hneh a, season tharah khelh thum chhung an chak zawn. City hi 2016/17 hnu lamah EPL a bul an tan tha ber tum a ni nghe nghe. Sheffield United an hneh tum hian Erling Braut Haaland chuan penalty a thelh a. Hei hi EPL-a penalty a thelh vawi khatna a ni a. Penal vawi sarih ngawt a pet goal zawn hnuin a thelh ve ta nge nge. Sheffield United laka City chakna goal thuntu Rodri khan season tharah goal hnih a thun tawh a, EPL 2022-23 season chhunga a goal thun zat a tluk der tawh.
Inrinni zanah Old Trafford-a an mikhual Nottingham Forrest lehthaltu Manchester United kha Old Trafford-a EPL an khelhah vawi 8 an chak zawn ta chiah a. Hei hi Jose Mourinho enkawl hnua an chak zawn rei ber tum a ni.
Liverpool in Newcastle United an hneh tum khan Reds si nghak Alisson Becker chuan vawi 7 zet save a nei a. Hei hi Liverpool record a ni a. Alisson hi EPL-ah Liverpool tan game khata save nei tam ber a ni.
Emirates Stadium-ah an mikhual Fulham laka goal khat thun Bukayo Saka khan EPL-ah goal 33 a thun tling chiah a. Kum 22 hnuai lam player zingah EPL-a goal thun tam pasarihna chiah a ni a, kum 22 chin hnuai lam an nih laia goal thun tam lamah Cristiano Ronaldo goal thun zat a tluk chiah bawk.
Spanish La Liga
Zirtawp zan khan Jude Bellingham goal thun hmangin Real Madrid in Celta Vigo an hneh. Real Madrid hian Celta Vigo an hmachhawn hnuhnung vawi 19-ah tlawm an nei lova, an intum hnuhnung vawi sarihah an chak zawn nghe nghe a. La Liga club zawng zawngah Vigo hi record an neih thatna ber a ni nghe nghe.
Celta Vigo laka Real Madrid chakna goal thuntu Jude Bellingham khan a club thar Real Madrid tan a khelh hmasak pathumah goal li a thun der tawh a. Assist vawi khat a nei tawh bawk. Borussia Dortmund atanga an lak luh Bellingham hi Cristiano Ronaldo hnu lamah Real Madrid player thar zinga bul tan tha ber a ni a. Real Madrid tan an game hmasa pathumah Ronaldo nen hian an goal thun zat a inzat chiah.
La Liga season tharah Real Madrid an chak vek laiin Sevilla erawh chuan goal riat ngawt an chhuah tawh thung a. Hei hi kum 1960-61 hnu lamah game hmasa pathuma goal riat ngawt an chhuah lehna hmasa ber a ni.
Italian Serie A
Chelsea a vul chhuak zo lo Christian Pulisic chuan a club thar AC Milan tan a khelh hmasak pahnihah goal hnih a thun der tawh a. AC Milan tan an khelh hmasak pahniha goal hnih thun thei hi Oliver Bierhoff, Andriy Shevchenko, Mario Balotelli leh Jérémy Ménez te chauh an ni thin a. Pulisic hian hnuhma thar arawn hnutchhiah ve leh. Christian Pulisic hian season liam ta khan Chelsea tan vawi 24 khelin goal khat chiah a thun a. Serie A-ah erawh vawi hnih khelin goal hnih a thun der tawh.
German Bundesliga
Bayern Munich forward thar Harry Kane chuan Bundesliga a khelh hmasak pahnihah goal thum a thun tling der tawh a. Bayern Munich player thar zingah an game hmasa pahniha goal thum thun thei pathumna chiah a ni a. Bundesliga lamah goal thun thei bik a nihzia a lantir zui zel.
French Ligue 1
Pathianni zanah 3-1 a Lens an hneh tumin Paris St-Germain forward Kylian Mbappe chuan goal hnih a thun. Mbappe hian PSG tan inelna hrang hrangah goal 214 a thun a, assist vawi 86 neiin, goal 300 zetah a inrawlh tawh. Ligue 1-ah bik hian goal 150 a thun tling tawh bawk.
Messi & Ronaldo
Football khel mek zingah ngaihven hlawh fal leh khai khin hlawh fal pahnih an awm a, an ni chu Lionel Messi leh Cristiano Ronaldo te an ni. Football ropui pahnihte kar tawpa an chet dan hmangin a tawp kan khar ang.
Lionel Messi chuan a club thar Inter Miami tan a vawi khatna atan Major League Soccer a hmachhawn a, MLS-a a inlan hmasak berah goal a thun a, a team thar a chakpui nghal. Inter Miami hi Messi an neih hmaa vawi 11 zet tlawm zawn tawh an ni a, Messi an neih hnuin vawi kua zet an chak zawn a, trophy pakhat an lak bakah US Open final an lut leh tawh bawk. Messi hian Inter Miami tan a khelh hmasak pakuaah goal 11 a thun tling der tawh a. A zawnin match kua chhung hian goal a thun loh pawhin assist a nei ziah a. Hei hi 2018-19 hnu lamah club tan a chet that leh ber tum a ni.
Al-Nassr lamah Cristiano a chetha viau bawk a, inrinni zan khan Ronaldo hian hattrick a siam. Inrinni zana hattrick a siam hi a career a hattrick vawi 63 zet a siamna a ni nghe nghe.
Kar tawp inkhela hnuhma lian zualte
