Karachi-a bazarpui kangah mi paruk thi

Karachi-a bazarpui kangah mi paruk thi
Pakistan-a Karachi khawpuia bazarpuia kangmei chhuakah mi paruk an thi a, kang thelhtuten zan thlengin a thelh hna an thawk.
Gul Plaza an tih bazarna hmunpui lian, dawr pawh 1,200 awmna leh sq metre 8,000-a zau thenkhat hi a kang a, a chim zui bawk avangin chhanchhuah hna pawh thawh a harsa niin officer-ten an sawi.
Chhawng nei bazar a ni a, kang thelhtu pakhat a thi tel a, mi 20 chuangin hliam an tuar a, a chhungah hian tang pawh an la awm rinna a lian hle.
Inrinni tawha kangmei chhuakah hian tual chhunga emergency services-in a hmun an thlen hian ‘a hnuai ber atanga chhuak hian a chhawng chung lam a kangkai tawh a, a in pum deuhthaw a kang chhuak tawh a ni’ tih an sawi.
Police hotu lian chuan thuneituten a la kan mek lai atangin a chhungah hian mi an awm leh awm loh leh ruang zawn hna an thawk nghal tih BBC a hrilh.
An chhungten mi 30 chuang chin an la hriat loh thu an sawi a, pawna anmahni buaipuina tur hmun siamah an awm khawm a, an chhungte chanchin an ngaichang a. Thuneituten chin hriat lohte hming leh an nihna kimchang hriattirna tur hmun an siam a ni.
Pathianni tuk thlengin Gul Plaza building atanga meikhu chhuak hi a la awm a, a in tam zawk hi a chim tawh a, a chim belh zel pawh a hlauhawm hle.
Karachi-a Rescue 1122 thupuangtu, Hassan Khan-a chuan bazarpuiah hian thil kang duh tak tak chi, plastic-a siam te, thawmhnaw, chhuahphah leh inkah rimtui tam tak a awm tih BBC a hrilh.
Karachi-a police surgeon Summaiya Syed-i chuan ruang paruk Civil Hospital-a an thawn thu leh hliam tuar thenkhatte pawh an thawn thu a sawi.
Pakistan President Asif Ali Zardari-a chuan thi leh hliam tuar chhungte a tawrhpui tak zet tih a sawi a. Karachi awmna, Sindh province sorkar chu sumdawnna hmun leh mihring chennaa himna dan zam kalpui dan ennawna chak taka hma la turin a hriattir nghal bawk.