Kum 2016-a World Championships gold medal awrhtu Great Britain chhuanvawr Jordan Thomas chuan karate inelna a chawlhsan thu a puang.
A hma kum 12 liamtaa champion Paul Newby hnu lama Briton zinga Karate World Championships gold awrh leh thei hmasaber Thomas hi karate world champion a nih tawh mai bakah European champion pawh a lo ni tawh bawk.
Thomas-a European kumite gold chu kum 2014 Finland ram 67kg huang atanga a hlawhchhuah niin, kum hnih hnuah he weight category atang vek hian Austria ramah Yves Martial Tadissi hnehin world gold a sualchhuak zui leh ngat a ni.
2020 Tokyo Olympics khel tura a tlin zawh loh hnu khan kum 32 mi hi GB Taekwondo World Class Performance Programme lamah a insawn ta a, mahse, chu lamah pawh chuan awm zui zel tum loin intihsiak a chawlhsan thu a puang zui ta a ni.
BBC Sport-in an kawmnaah Thomas chuan tunhnai kum tlemte liamta chhung kha a tan kum khirh leh harsa tak mai a nih thu sawi chungin a sport vawn laite a han thlak a, karate atangin taekwondo lamte a han luhchilh a, kalphung thar leh skill tharte zir a lo ngai a, a rilru lam chuan la peih tho mah se tun hi a tan chawlhna hun tha leh dik nia a ngaih thu a sawi.
Thomas-a pa William pawh kha kum 1992-ah world karate champion a lo ni ve tawh a, a fapain a hnung a rawn zui ta a ni.
Karate world champion hlui Jordan Thomas chawl ve ta
