Karnataka Cabinet ten Delhi ah lungawilohna lantir

Karnataka Minister Satish Jarkiholi chuan southern State a Congress sorkar chuan Centre in an State sum tur Rs 1 lakh crore chuang a pek duh loh avangin nationla capital ah lungawilohna an lantir thu a sawi.
Karnataka Chief Minister Siddaramaiah leh Deputy Minister D.K. Shivakumar te bakah State Cabinet te chuan Delhi ah Jantar Mantar ah ‘Chalo Delhi’ tiin central sorkar tax devolution policy an duhloh lantirna an nei a.
Siddaramaiah chaun Central sorkar chu economic disparity kalpui tia puhin a sorkar chuan tax devolution a thleibik neih leh ‘Kannadigas’ te grants ah hleihneia thilti tiin a sawi bawk.
Jarkiholi chuan Central sorkar chuan an demand a ngaithla tur a ni tia sawiin, “Karnataka hnenah Rs 1 lakh crore chuang pek a ni lo va. Union Home Minister, Union Finance Minister te pawh kan hmu tawh a, awmzia a nei lo va, kan sum tur kan la dawng ve lo a ni. Chuvangin lungawilohna kan lantir a ni. Sorkar hian kan demand te hi a dik avangin a ngaithla tur a ni a. Chief Minister rualin mi tam tak kan lo kal a, Central sorkar hian sawi a nei tur a ni” tiin a sawi.
An beihna chu party tan ni lovin State mipui te tana an beihna a ni tiin a sawi bawk a.
State minister dang Ramalinga Reddy awhin kumin hian Karnataka a taluks 220 ah khawkheng puan a ni chungin Centre in rupee khat pawh tanpuina min la pe lo a ti bawk a.
“Kan State atangin Central sorkar in chhiah Rs 4,50,000 tax vel a la a, keini chuan Rs 50,000 vel chauh kan la a ni. Kuminah Ta;luks 236 awmah 220 chu khawkhenna hmuna puan a ni a. Karnataka tan rupee khat pawh thehchhuah a la ni lo” tiin a sawi bawk.
Karnataka Pradesh Congress Committee working president Saleem Ahmed pawhin, “Keini Karnataka ten khawkheng kan tuar mek a. Thla li vel kalta khan Rs 17,000 crore kan mamawh thu kan sawi a, cheng khat pawh min la pe lo. Chuvangin Jantar Mantar ah kan lungawilohna kan lantir a ni” tiin a sawi bawk.
Thawhtan khan Lok Sabha a Congress leader Adhir Ranjan Chowdhury pawhin ram pumah non-BJP state te chu an sum dawn tur hrensak zel an ni a. Chuta example hnaivai ber chu Congress rorelna Karnataka a ni tiin a sawi bawk.
Union Finance Minister Nirmala Sitharaman erawhin Congress leader puhna chu hnawlin politics thila ngaihdan mi thenkhat ten an thehdarh mek a ni a ti ve thung a.
“Ka mimal duh dan ang ngawtin ka State ngaih emaw State dang emaw ka duhsak ngawt thei lo, ka party politics kalh a ni a. Rules 100% in ka zawm a, chu chu thil ka kalpui dan a ni” tiin Sitharaman chuan tax devolution chu Finance Commission duhdan anga kalpui a nih thu a sawi a.
“Finance Commission in rawtna a siam te chu kalpui mai tur ka ni a, hlauhna leh duhsak bikna tel hauh lovin ka kalpui a ni. State thenkhatte duhsak lo bik anga sawina hi politics thila ngaihdan a ni a, mi thenkhat te aupui mek a ni” a ti a.
“Finance Minster tu pawh ni se he mi te State hi chu ka ngaina lo payment ka pe dawn lo a tih theih loh” tiin Union Finance Minister Nirmala Sitharaman chuan chhanletna a siam a sawi thung.