Karnataka Congress-in an
chhungkuaah inpawhna awm lo ti
Karnataka-a rorel lai, Congress party chhunga hruaitu zawk nih inchuhna boruak chu sawi thar leh a awm mek a, anmahni erawh chuan chief minister thutthlenga thu tur chu party lotu lawkte chin fel tur a ni a, an inkarah inpawhna a awm lo niin an sawi.
Health Minister Dinesh Gundu Rao-a chuan hruaitu inthlak chungchangah engmah thil sawiho pawh a awm lo niin a sawi a. “Engmah sawiho mek pawh a awm lo. MLA thenkhatin thil an sawi a, chu zawng chu a ni mai. Chief minister leh deputy chief minister-ten party lotu lawkten thu tawpan siam dawn tiin thu an titlu tawh a, a bak hi chu titi lengvak mai mai a ni a. MLA, chief minister leh deputy chief minister zawng zawngin party hotu liante thu hi an zawm vek a, inpawhna engmah a awm lo. Harsatna a awm lo va, Congress party chhungah inthenna a awm lo va, pumkhat vek kan ni,” a ti.
Home Minister G. Parameshwara-a pawhin party hotuten thutlukna dang an siam a nih loh chuan chief minister thutthlengah Siddaramaiah a thu zel dawn tih a sawi a. “Thil awm dan an thlithlai reng a, mamawh a nih chuan thutlukna an siam mai dawn a. Tunah chuan engmah thil tihdanglam ngai niin an hre lo va, engmah thil eng emaw awm ang hi sawi a awm lo,” a ti bawk.
Siddaramaiah-a hun chhung chungchangah pawh, “Siddaramaiah hi tuin nge chief minister-ah siam? Party hotu lawkte an ni a, anni hian an tih chhung chu Siddaramaiah hi a awmna ngaiah a awm ang,” a ti.
“Ka hriat ve chinah kan hotute hian chief minister thlak lam hawiin thu engmah an la titlu lo,” tiin Parameshwara-a chuan a sawi a, kum 2023 assembly inthlana chief minister innih chhawk tura sawi ang kha engmah a awm rih loh tih a sawi.
“Siddaramaiah-a hi inthlan zawhah Congress Legislature Party hruaitu atana thlan a nih angin chief minister a ni a. A lak lawkah a ni dawn lo tih engmah sawi a awm lo va. Chutiang chuan Siddaramaiah hi chief minister a la ni a, budget duan mek niin thla tharah pharh a ni ang,” a ti.
Chief minister fapa, MLC Yathindra Siddaramaiah-a’n thil sawi chungchangah pawh Parameshwara chuan, “Kan hotuten thu an titlu dawn ami tuten emaw an lo sawi hi a tul lo va. Kan dinhmun leh boruak azirin thutlukna an siam mai dawn a ni,” a ti,
Party chhungah inpawhna nasa tak a awm nia sawina pawh phain, “Tun hnai maiah pawh Congress Legislature Party thutkhawm a ni a, eng emaw boruak awm ni sela chuan chief minister emaw, deputy zawk emawin sawi chhuakin zawhna pawh an zawt ang,” a ti.
Deputy Chief Minister D.K. Shivakumar-a chuan tun hnaiah New Delhi-ah party hotute hmuin an thil sawiho erawh engmah a sawi lo va. “Ka puang thei lo va, hunin a la rawn lantir mai ang. Politician vek kan ni a, politician chuan a duh angin politic a khel duh thin a. Kan inhmu khawm a, sorkar thil titu leh party thil ti turin ka kal a, politic thila kal ka ni bawk,” tiin a zin chungchanga sawi.
Yathindra Siddaramaiah-a chuan a hma khan Bidar-a thu a sawinaah, “Ka, Siddaramaiah hi kum nga chhung chief minister a ni dawn a, engmah hemi lamah hian sawi a awm lo,” a ti.
“Tun dinhmunah party hotute chief minister thlak tumna an nei rih lo,” a ti a, “Hruaitu inthlak tumna ang hi engmah sawi a awm rih miah lo a ni,” a ti bawk.
Karnataka Congress-in an chhungkuaah inpawhna awm lo ti
