Katy-i’n MTV VMA Video Vanguard Award dawng dawn

Katy-i’n MTV VMA Video Vanguard Award dawng dawn
Katy Perry chu 2024 MTV Video Music Awards (VMA)-ah Video Vanguard Award hlan a ni dawn a, September ni 11-a UBS Arena, New York-a award semnaa hian a hla hrang hrang a perform nghal dawn bawk a ni.
Katy Perry hian MTV VMA ngaihhlut video of the year chu 2011 khan ‘Firework’ avangin a lo dawng tawh a, tunah Video Vanguard Award a dawng leh dawn ta a, heng award chi hnih dawng ve ve thei 10-na a ni dawn a, Madonna, Peter Gabriel, R.E.M., Britney Spears, Justin Timberlake, Beyoncé, Rihanna, P!nk leh Missy Elliott te hnung a zui ve dawn ta a ni. Katy Perry hian 2017 khan VMA hi a lo host taw bawk a, Video of the Year leh Video Vanguard Award dawng a, he award show hi host tawh bawk tumah an la awm lova, Katy Perry hi a hmasa ber tur a ni bawk.
MTV VMA-ah hian Video Vanguard Award hi tun kum sarih chhung chu a zawnin a dawngtu hmeichhia vek an la ni a- (2016), P!nk (2017), Jennifer Lopez (2018), Elliott (2019), (2020 leh 2021-ah COVID-19 avangin award sem a ni lo), Nicki Minaj (2022) leh Shakira (2023) ten tun hnaiah an dawng a, kumin Katy Perry-i’n a dawng ve leh dawn a ni.
MTV VMA hi September ni 14, 1984 kha an sem vawi khatna a ni a, kar ruk hnuah Katy Perry hi a piang ve chiah bawk a, MTV VMA nena inrual an nih ber chu. 2009-ah a vawi khat Perry hi VMA-ah a perform a, Queen hla ‘We Will Rock You’ a sa a, Aerosmith guitarist Joe Perry nen an che dun. 2013-ah inlan lehin, a hla hit ‘Roar’ a perform a, 2017-ah show a host bakah a perform leh bawk.
Award pawh panga a dawng tawh a, 2011 khan ‘Firework’ avangin video of the year a dawng a, Ye (chutihlai chuan Kanye West a la ni) nena an thawh dunna ‘ET’ avangin best collaboration leh best special effects a dawng bawk. 2012-ah ‘Wide Awake’ avangin best art direction a dawng a, 2014-ah ‘Dark Horse’ avangin best female video a dawng tawh bawk.
Katy Perry hian 2008 atang khan Billboard Hot 100 top 10-a a lang thei hla 14 nei tawhin, chung zinga pakua chu No.1 a kai a, a album panihna ‘Teenage Dream’ a hla panga chu Hot 100 chart No.1 kaiin, Michael Jackson-a record a nih rual a, anni pahnih chiah hi album pakhat atanga hla panga Hot 100 chart-a No.1 kai pha nei thei an la ni.
MTV hian Video Vanguard Award hi tunhma chuan Michael Jackson Video Vanguard Award tiin an sawi thin a, he award bik hi Michael Jackson chawimawi nan 1991 atangin ‘MIchael Jackson Video Vanguard Award’ tiin a hming an vuah a, mahse, 2019-a Leaving Neverland tih documentary film a chhuah hnuah, Michael Jackson nungchangah mawi lo deuh a awma a lan avangin Michael Jackson tih chu paihin Video Vanguard Award tih chauh an hmang zui ta zawk a ni.
Video Vanguard Award hi Beyoncé, Madonna, Janet Jackson, Missy Elliott, LL Cool J, Rihanna, Shakira leh Justin Timberlake te pawhin an dawng tawh a, he award dawng hmasa ber chu David Bowie, The Beatles leh director Richard Lester te niin, 1984-a MTV VMA sem tan kuminah Video Vanguard Award hi an indawn tawm a ni.
Kumin MTV VMA nomination-ah hian Taylor Swift a lang sar ber a, nomination 10 a nei a, ‘Fortnight’ hlaa Swift thawhpui Post Malone chu nomination neih tama Swift dawttu niin, pakua a nei ve thung. Anni pahnih bakah hian Ariana Grande, Eminem, Sabrina Carpenter, SZA, Megan Thee Stallion, Lisa, Olivia Rodrigo leh Teddy Swims te pawh kumin nomination-a langsar pawl an ni.