Mizoram kawngpui pawimawh, National Highway 306 a chhiat em avangin mipuiin harsatna an tawk a, tun hnaiah a chhe leh telh telh. Bungraw phur lirthei pawh an lo ding tawh thin a, an ding leh mai thei.
National Highway 306-ah hian Sairang leh Khamrang inkar vel a chhe zual a, Thawhlehni hian Mizoram Truck Drivers Association, Mizoram Truck Owners Association, Mizoram Oil Tanker Drivers Association leh Kolasib-a lirthei hmanga eizawngtu pawl hrang hrang intelkhawmna JAC te’n a hmuna en an tum. An hmuh dan azirin tlan rih loh mai pawh an rel mai thei tih thu dawn a ni.
Khamrang leh Sairang inkarah hian Mualkhang leh Sairang inkar a zia deuh a, a zia deuh an tih pawh hi a chhe hle. Kawngpui lai taka zau pui puia khuar te a awm a, kawng a titoh bakah a diak kawi bawk. Mualkhang thlang lam a chhe zual.
Khamrang leh Sairang inkar kawng a chhiat em avang hian lirthei pawh an thang rei a, Aizawl atanga lirthei a ruaka chhuak, chhuk lam pawh ni li te an thang!
Truck khalhtute chuan kawng siama hnathawk an awm mumal lo nia an hriat thu an sawi a, hnathawk chu hmun thenkhatah awm ve bawk mah se pahnih pathumin lung an vawm leu leu a ni mai a, an ti.
He kawng chhia hian July thlaah khan nasa takin Mizoram a lo nghawng tawh a, August ni 2 atanga ni 7 thleng khan kawng siam hna chak taka thawh a nih theih nan bungraw phur lirthei an chawl. Harsatna pawh a zia deuh a, mahse kawng hi an siam hnu lawkah a chhe leh a, September-ah chuan a chhe hle tawh tih thu dawn a ni.
Khamrang leh Sairang inkarah hian truck an tang nasa a, traffic a jam nasa. Kawng sir hmun hrang hrangah thui fe fe truck hi an ding mek.
Thawhlehni-a he kawng tlawh tumtute hian a hmunah a huhova endikin an kal zel dan tur ngaihtuah an tum a, a tul a nih chuan tlan rih loh mai pawh an rel mai thei tih an sawi.
Hmun dangah pawh kawng chhia vangin harsatna a thleng a, Mamit kawngah pawh lirthei an tang nasa. Aizawl atanga buhfai phura Mamit kal turte pawh Dialdawk velah an tang nghal a, Inrinni-a chhuak, Dialdawk vela Thawhtanni-a la tang te pawh an awm.
Kawng chhe telh telh, lirthei tlan lo leh mai thei
