Kawng chhiain eizawnna nghawng

Kawng chhiain kawng hrang hrangin Mizoram a nghawng a, an eizawnna a nghawng avanga harsatna tawk pawh an awm.
Eizawnna nghawng han tih hian kawng a chhiat avanga eizawnna lama harsatna tawk an awm nual ang a, lirthei neitute leh a enkawltu te, dawrkai te, phai atanga bungraw latute (agent leh dealer) te pawh a nghawng. Eizawnna lama harsatna tawk, mahse hriat hlawh lem lo pawh a awm theih ang a, internet hmanga sumdawnna online shopping lama thawkte hi chutiangah chuan an tel ngei ang.
Online shopping-ah hian a hmunthute leh a enkawltute chu thuhran ni se, thil chahtute a hmuna pe thintu delivery assistant (DA) te’n hna an neih hleih theih loh avangin an ni tin khawsak a nghawng tih thu dawn a ni.
DA-te hian mi thil chah, a chahtute hnena an pek zat azirin hlawh an nei thin a, tunlai hian hlawh an nei thei meuh lo tih an sawi.
“Hna kan neih loh avangin kan khawsak a buai a. Inhlawhna dang kan han dap na a, in sa laite an lo chawl ve thuap a, inhlawhna tur a vang leh bawk si a,” tiin DA pakhat chuan an dinhmun a sawi.
Cement a vang a, in sakna bungrua thil dang pawh a vang. In sa lai engemaw zat chu an chawl a ni.
Aizawlah online shopping khawihtu courier 10 chuang an awm a, a lian ber pakhat enkawltute chuan June atangin bungrua a thlen mumal tawh loh thu an sawi. Courier pakhat chuan tun Thawhtanni khan bungrua tlem azawng a thleng a, hei hi ni ruk vel hnua thleng leh a nih thu, chumi chhung chuan DA leh thawktu dang pawh an chawlh mai thu, chutiang chu tun hnaiah a thlen fo thu te an sawi.
DA-te sawi danin, bungrua hi rei deuh deuh a thleng lo a, a thlen pawhin a thleng tlem. A thlen har thin avangin thil chahtute’n an lo ‘cancel’ hman fo bawk. Tun Thawhtanni-a bungraw thlenna courier-a DA-te pawhin an thil chah a thlen har avanga lo cancel an awm teuh thu hi an sawi.
DA-te chuan nikum lamah pawh kawng chhiat vang hian an lo chawlh tawh thin thu hi an sawi a, nikum aiin kuminah an khaihlak nasat zawk thu an sawi.