Kawng dang lo turin sawrkarin ngen Dan luih chuan ‘force’ hmang dawn

Vairengte leh Sairang inkar kawngpui siamthat thuai phuta helai kawngpui dan tintuah mektute chu sawrkarin state chak lakluhna ber a nih avang leh kawng hi theih ang anga siamthat mek a nih avangin dang lo turin a ngen a. An dang lui a nih erawh chuan force hman a ni dawn tih a sawi lawk.
Home minister K Sapdanga chuan Mizoram Tipper Association District Hqrs Kolasib-in Vairengte to Sairang leh Bairabi to Kolasib bakah Kawnpui to Durtlang kawng chu October 23-26 chhung lirthei tlan theih loha dan an tum tih sawiin, Mizoram chak lakna kawngpui pawimawh ber ni li chhung danchah tum chu sawrkar chuan tha a ti loa, kawngpui danchah hi rem a ti lo tih a sawi.
“Fur ruahtui tlak hun a tawp chho a, siamthat mek Vairengte leh Sairang kawng pawh kawng siam a khaihlak lohna turin Kawnpui leh Sairang inkar kaltlang tur lirthei intlan chhawk tir thin a ni. Ruahtui tla a tlem tak avangin kawng siam pawhin hma a sawn zel a, a tam zawka lirthei chhhuah niin lirthei tangkhang a tlem zel a ni,” a ti.
October 22 zing dar 8.30 thleng khan lirthei tangkhang a awm lo tih sawiin, Aizawl lam panin lirthei load phur 367 chhuah an ni a, Kolasib lam pan lirthei 618 chhuah a ni bawk tih a sawi. Darkar 24 kalta chhungin a vaiin lirthei 985 he kawngah hian an tlan tlang a. Kolasib bawrhsap hoa thutkhawmah contractor-in November 1 atangin chak zawka siamthat an tum tih an sawi thu a sawi bawk.
“Hetianga sawrkar leh NHIDCL-in kawng siamtha tura hma an lak reng lai a, lungawi loh lantir a, Mizoram mipui tana harsatna siam zawnga kawng dang tum hi sawrkar chuan kaltlangpui lo se a duh a. NH 306/06 hi Mizoram chak lakna leh mipui inkalpawhna kawng pawimawh a nih avangin he kawng dan hian Mizoram mipui tan harsatna nasa tak a thlen dawn,” K Sapdanga hian a ti.
National Highway danchah leh kawngpui dan chu dan hnuaiah National Highways Act 1956 Section 8B bakah Bharatiya Nyaya Sanhita 2023 section 126 leh section 285 kalh a ni a; kawngpui dang chata mipui mamawh ‘essential commodities’ phurhkualna tihbahlah chu Mizoram Essential Services Maintenance Act 1990 bawhchhiatna a nih avangin na taka hrem theih an ni tih Home minister hian a sawi a. Kawng dan tumtute chu transport vehicles an nih angin dan fel tak hnuaia permit pek an ni a, sawrkar duh loh zawnga hma an la zel a nih chuan The Motor Vehicles Act 1988 hnuaiah permit cancel thlenga hma lak theih a ni tih a sawi bawk.
“Kawngpui pawimawh danga mipui tana harsatna siam thei zawnga hmalak an tum hi thulh turin Mizoram sawrkar chuan a duh a. Chutiang a nih loh a, mipui tana harsatna siam thei zawnga hma lak a nih chuan sawrkar chuan a tul ang zelin hma a la dawn a ni,” a ti.
Zawhna chhangin Home minister chuan, a tul angin sawrkarin hma a la zel dawn, an tih hian a tul anga force hman a tel tih a sawi a. Mizoram Police hotute chuan kawng dan tumna hi an zirchiang tawh a, a tul angin Kolasib district-a force mi bakah Aizawl atangin an intirh belh dawn tih an sawi a ni.
PWD minister Vanlalhlana chuan kawng chhia thawmtha in an thawk reng a, kawng chhiat hnu ah tun lai chu a that ve lai ber zawk niin, lirthei tang pawh an awm loh lai tak a ni tih a sawi.
Supply minister B Lalchhanzova’n zawhna a chhan danin, buhfai stock a tha a, eirawngbawlna gas chu hunpui laiah pawh a harsatna lohna turin tan an la tih a sawi.
Kawng dan kaltlangpui tum
Mizoram Tipper Association District Hqrs Kolasib leh Joint Action Committee Kolasib chuan kawng dan an tum chu an kaltlangpui dawn tih an sawi.
The Aizawl Post thudawn danin, kawng dan tumtute hian sawrkar hotute atangin leh palai dang atangin an thil tih tum thulh tura ngenna an dawn avangin tawlh leh rih a, kawng an siam mek dan ngaihchan an rilruk mek laiin, Nilainia sawrkar atanga vauna lam hawi thu a rawn chhuak chu an member-ten hrethiam loin an lo rel tawh dan angin kawng dan hi kaltlangpui an tum tih an sawi.
Theih ang anga sawrkar hmalakna an lo thlawp ve tawhna leh state pawn lam truck/ tanker rawn luh loh tum ho pawh Mizoram mipui tana harsatna thlen thei a nih avangin lut turin an lo ngen ve tawh thinna sawrkarin a hriatpui lo chu an rilru a ti na tih an sawi a ni.
An sawi danin, kawng hi Kolasib Rengtekawn, Kawnpui leh Lungdaiah dan an tum a, ruahmanna dang pawh an siam thar thut thei tih an sawi.
Hetihlai hian Kolasib district magistrate chuan, mi tumahin mimal leh pawl, intelkhawm leh inzawmkhawm anga action comittee din chawp emaw pawhin eibar lakna kawngpui – Bairabi to Kolasib, Vairengte to Khamrang leh Kawnpui to Durtlang chu eng vang mahin an dang chat tur a ni lo, tiin thupek a chhuah.
‘Heng kawngpui tarlan atanga metre 10 huamchhungah dan loa mi 5 aia tam awmkhawm phal a ni loa; thupek hian 2025 October 23 atanga thu leh awm hma chu thla hnih chhung a huam a; bawhchhia chu dan hmanga hrem theih a ni,’ a ti.