Centre for Environment and Social Justice (CESJ) working chairman Pi Vanramchhuangi chuan nimin khan Anti Corruption Bureau (ACB)-ah FIR thehlutin, Luangmual to Vaisam (Lunglei District) PMGSY kawng laih meka hna chhe lutuka mawhphurtu contractor, VRS Construction, Zonuam Aizawl leh Lunglei Road Division-II Lung- lei Mizorama a hotu lu berte hrem an nih theih nan dan anga hma la turin a ngen a. FIR tanpuitu atan Luangmual to Vaisam kawng laih mek hna chhiat dan thlalak leh video clip-te thehluih tel nghal a ni bawk.
He project hi cheng vaibelchhe 45.18 man, Km 27.7 a thui niin, hna hi June ni 10, 2019 khan thawh tan a ni a, June ni 10, 2020-a thawh zawh tura ruahman a ni. Hna hi zawh hman a nih loh avangin July 31, 2022 thleng hun pawhsei leh a ni. Hna thawh hun chhung pawhsei sak a nih hnuah hna a chhiat avangin FIR thehluh ngaiin a la awm zui bawk, tihna a ni.
FIR thehluh ngai khawpa hmasawnna project hna chhe lutuk a awm leh thin hi a vanduaithlakin a thinrimthlak ta hle. Tunhma kum tam tak kalta atang tawh khan, a bikin kawng laih chungchangah, hnathawh dan dik lo leh hna chhe lutuk social media lamah a darh nasa thei hle a. ‘Thuneituten an enfiah’ tih bak, a hnu lama action lak zui a nih dan hi mipui lam chuan kan hre zui tam lo hle thin. Khatiang thilah khan ngaihhnathiamna nena rorel a nih thin vang nge, tun thleng hian hetiang thil hi a la reh thei lo va. Hei hi dik lo taka mipui sum tihchingpenna a nih bakah, mipui leh sawr kar zah lohna lian tak a nih avang in, tun hnua hetiang thil a thlen leh tawh lohna tur leh a reh hlen vang vangna tur khawpa hmalak theih hi a hun ve ta hle a ni.
Tuna sawrkar thar hnuaiah hian, chief minister kaihhruaina hnuaiah, Mizoram state project monitoring committee din a ni a. Ram hmasawnna hnathawh mekte tha tak leh chak taka a kal a, hun tiam chhunga hna zawh a nih thin theih nana din a ni.
Hetianga kawng laih hna chhia avanga FIR hial theh luh a han nih takah hian, monitoring committee tan pawh, thil awmzia a hmuna enfiah a, committee din a nih anga hma a lak nghalna tur a nih hmel ta hle a ni.
Kawng laih hna chhiaah FIR
![](https://theaizawlpost.org/wp-content/uploads/tap_logo-min-large.jpg)