Kawng laih vungin Tlawng
fintu luite chhilh nual tawh
Aizawl bypass road tur laih mek chuan Tlawng fintu luite pahnih a chhilh nual tawh tih finfiah a ni a, Tlawnglui a thlen lohnan ruahmanna siam nghal a ni.
Chief minister thuchhuah bawhzuiin Aizawl bypass tur, Sihhmui atanga Muallungthu panna kawng laih mekin Tlawng lui a tibawlhhlawh nia sawi chu February 24 khan District Disaster Management Authority Aizawl chairman, bawrhsap Er Lalhriatpuia kaihruaiin a hmunah enfiah a ni a. Mihring kal theih lohnaah pawh drone hmanga en a ni.
Muallungthu bula Tuisik lui leh Mauphir lui chu nikum fur lai khan kawng laihna vung hian a chhilh nual tawh tih finfiah a ni a. Mauphir lui hian Tuisik lui finin, chu chuan Tlawng lui a fin leh. Engtia thui nge leivungin a chhilh tih hre turin kea luidung zawhthlak a ni a, Mauphir luia leivung hian Tuisik lui a la thleng lo tih hriat a ni. Tuisik luia leivung pawh hian km.2 chuangin Tlawng lui a la thlen loh bakah leivung emaw chhirh hnuhma hmuh a ni lo.
Hetiang hi tun dinhmun ni mah se, furpui lo thleng turin Tlawng luia leivung a lenthlak lohnan a danna tur ruahmanna tlangpui a hmunah sawiho a ni a. Ruahmanna kimchang zawk siam turin a tul anga drone survey neih bakah thutkhawm leh nise an ti. Hetiang tho hian Serlui leh Setlak lui lam pawh hma lak tum a ni.
Tlawng lui hi Aizawl tui lakna ber a nih avangin department dang pawh a tul dan ang zela thawhkoa, infinchhuah zel turin bawrhsap chuan a ngen a ni.
Enfiahnaah hian PWD, PHE, Geology & Mining, AMC, Mizoram Pollution Control Board leh Pachhunga University College mithiamte an tel a ni.
Kawng laih vungin Tlawng fintu luite chhilh nual tawh
