Kawng laihin a sut tur ram neitu la
chhuak lo te chhuak turin hriattir
National Highway 54 kawng laih zauh tur, package 6 huamchhung Lunglei district-a hna thawh mekah zangnadawmna la tawh, an in leh lo la chhuahsan duh lote chu an ram chhuahsan turin Lunglei district bawrhsap chuan a hriattir nawn.
Lunglei bawrhsap Ramdinliani hian Inrinni khan he project kal mek hi a hmunah tlawhin, package 6 huamchhunga awm Tawipui North I leh North-II, Tawipui South leh Thingfala kawng laih zauhin a tihchhiat tur ram neitu, compensation la tawh, an in leh lo la chhuahsan lo te chu chhuahsan tura hriattirna – eviction notice a hmunah a pe.
JICA sum hmanga thawh NH 54 kawng laih zauhin a sutchhiat tur ram neitu, hmundanga insawn ngaite hi kum 2019 atang khan zangnadawmna pek tan an ni a; zangnadawmna dawng tawh, la inthiarfihlim duh lo an awm nual avangin contractor-te hnathawh a ti sukuk nasa nia sawi a ni.
Chhuak tura hriattirna hi Lunglei bawrhsap atangin tum hnih pek an ni tawh a, la chhuak lo an awm avangin an chenna ina kalchilha hriattirna hi pek leh niin, hriattirna pek an nih atangin ni 15 chhung insawnchhuak tura tih an ni. Hun tiam chhunga an la chhuak duh lo a nih chuan tih luihna hmanga insawn chhuah tir an ni dawn tih hriattir an ni.
Eviction notice hi Tawipui North-II ah mi 6, Tawipui South ah 18, Thingfal ah 32 pek phawt an nih thu dawn a ni.
Kawng laihin a sut tur ram neitu la chhuak lo te chhuak turin hriattir
