Kawng siam hnu leh sawhthing
lei hnu ah chauh inthlan puang
– Lal Thanzara
Aizawl Municipal Corporation inthlan chu sawrkarin Aizawl khawpui kawng a siam hnu leh sawhthing an lei that hnu ah chauh an puang niin Congress hruaitu Lal Thanzara chuan a sawi.
Thawhtanni AMC inthlan neih tura an party official candidate an puan leh manifesto an tlangzarhnaah MPCC president Lal Thanzara chuan, inthlan a hun takah tih loh chhan nia lang, kawng siam leh sawhthing lei an zo ta nge, tunah chuan AMC inthlan hun pawh an puang ve ta tih a sawi a. Inthlan hma in sawhthing chingtute hnenah kg ah Rs. 50 zela leisak turin an inzuar a, tun an dinhmun chu a lungchhiat thlak hle tih a sawi.
“A hma chuan sawhthing hi kg ah Rs. 100, Rs. 80 ten an hralh theih laiin, tunah chuan sawrkarin kg ah Rs. 50-in kan lei ang, an tih avangin Vaiho in Rs. 50 aia to in an lei duh ta lo a. Tunah chuan Rs. 25 ten sawhthing hralh a lo ngai ta,” a ti.
AMC chu Aizawl enkawla cheitu tur a ni a, tuna Aizawl khawpui chu cheithat a nihna hmuh tur a awm loa, sum erawh an hmangral ve reng si niin MPCC president hian a sawi. “Aizawl khawpui cheitha tur leh tihmasawn zual turin Congress kan lo pen chhuak leh a ni,” a ti.
Assembly Session-ah ram hruaituten Aizawl khawpuiah thil pawimawh engmah dah tawh loh tur, tih thu te an sawi chhuak tih sawiin, hei mai ni loin, khawpui hi Thenzawl lama sawn an tum hial tih sawiin, “Aizawl khawpui enkawl hna hi ZPM chungah chuan dah ngam a ni dawn lo,” a ti.
An party chuan khawpui enkawl turin milar satliah leh hausa ringawt an zawng loa, khawtlang hmangaihtu, Aizawl khawpui tana thahnemngai taka hna thawk thei tur an zawng zawk tih Lal Thanzara hian a sawi bawk.
Kawng siam hnu leh sawhthing lei hnu ah chauh inthlan puang – Lal Thanzara
