C. Vanlal Ruaia
9862569310
Kawng siam thla kan thleng e… Kum 39 kan lo hmang ta a. Brig T Sailo a rorel hnuin MNF leh Congress-in heng hun hi an hmang liam a. Heng rorel hun chhung hian Party mi ten Contract an thawk nasa em em a, Thawh chin tur a lian emaw a te emaw Party mite inpein thenkhat chuan an hralh leh a, hlep neiin hralh an tum leh a. Hetiang hi ram hmelma lian tak a ni a. Tin, Corruption chi khat a ni bawk. A danah chuan Registered Contractor an awm a, an grade azirin hna lian leh te an thawk tur a ni. Mahse Party mi ten Registered Contractor hming an hawh thin ni awm tak a ni. Sum nei lem lo leh Development work thawhna tur hmanrua (Modern assets, Earth Mover etc) nei miah lo pawn an thawk ve zel tho a.. Hetiang hi vawiin ni thleng hian tih dan pakhat a ni. Party office lamah an intawllen mup mup thin…Hetiang ti lo ngam Ministry hi kan la nei miah lova. Hetianga hna Quality lo lutuk a zawh pawh zo hlei thei lo, contract thawh hun chhung rei lutuk hi mipuiin an tuar nasa em em a ni
Tuna kan sawrkar ZPM (Zoram People Movement) a hming te chu mawi tak a ni. Heng te hian chuan han ti lo hram thei se. Tin, Kan Ram Lalber CM-in EIRUKNA a do tlat hi a ropui a. Eirukna a awm vaih chuan an pir chhuak thuai ang. Kawng pawh an siam leh ta. Hna lian te hi chu Standard Equipment nei leh sum lama tlin ten thawk hram se. Puk chawp a contract thawh hi ram chhiatna a ni.
1. Tuivamit Ramrikawn via Sihhmui Bazar-Lengpui Airport Road:
He kawng Project hian hma a sawn lo hle. Airport panna kawng pakhat ringawt mai neih hi a fel lo ve tiin Ministry tin hian an sawi liam liam a. Vaivakawn Company peng Lei tla hniam hi lei chhungril lam atanga rawn che a nih avangin….mihring chaknaa siam that mai chi a ni lo. He kawng hi Ministry hmasaah khan an lai tlang vek tawh a. Surface siam rual Culvert siam ngai te, etc. ZPM Ministry hian an tipuitling mai dawn emaw tih laiin chhunzawm a awm thei lo. Lengpui Airport kawng pawh a hnai sawt dawn. Mipui zin tur tan thlamuang taka tlanna tur a ni. Han tipuitling thuai se, kawng thar hlak, an thil tih that a lan sarh dawn nen.
Kumin fur laia Lengpui kawng kham sanga lung a tlak khan phai lam atanga kan zin haw BUICHALLI kawngah kan haw a, Buichali leh Sairang inkar kawng chhe lutukah khan Central Minister lo zin sekho kha an tlan ve lo thei si lova. Kan kawng zah thlakzia kha. Anni chuan Special-a enkawlna dawng kan nih dan – DONER, NLCPR, NEC tih ang reng te chu an beng angin an hre chiang si a. Inti Christian viau mah ila, kan rinawm leh rinawm loh chu an mit ngeiin an rawn hmu ta thin a ni.
2. Setlak Lui Aizawl Greater Water Supply Scheme Phase 3:
Kum 2018 atang khan he project Pipe line lian an phum atang khan, Tuivamit Ramrikawn leh Luangmual Industry peng Tri-junction inkar hi that ni a la nei lo va. Km 1 vel awrh hi. Police Training Centre, Sahuan, (Zoo), Sakawrtuichhun, Luangmual Industry, Central Jail veng te chuan, kum 2018 vel atang khan kawng tha an nei ngai tawh lova. Khua a chhiat leh a diak em em a, khua a that leh a khu em em a. Engati nge an siam ve ngai loh? tia zawhna chu, Highway Construction kal mek an ti a. Under Construction an ti zel a ni. Tunah pawh he pipe line hian Zohnuai Lei chein a tihchhiat avangin Diversion siamin University-a kal thin leh heng lam mipui hi harsatna a siam leh a, Kawng block a tam em em a ni. Sawrkar thuneitute chuan “Under Construction a ni a.. an ti zel a.”.. tiin Local Council te chuan an sawi a. Municipal Area hetianga kawng chungchang sawrkarin a hlam chhiah hi chu mipui hian an tuar rei ta ngar ngar ngawt mai. Chutih laiin mipui tam tak eizawng Office kal, Industry products leh supply phur-te Aizawl Hospital mamawh Oxygen supply phur te thil dang industry products phurin an tlan reng a. Highway construction hi sawrkar hian chhuanlamah hmang tawh lo sela. Ni tin mipui eizawng leh hnathawk hi ngaipawimawh ve zawk teh se. Highway Construction chhuanlam a, kawng zauhna tur mimal ram compensation pawh pe zo thei chuang bawk si lova, mipui chenna area metal sak loh ri ngawt hi, Municipal area nih ve siah chuan a hrehawm khawp mai. In thar sa dawn ila, Tax lakna tur lamah chuan under construction a nia an ti lo. Municipal lam thlengin an rawn strict fu bawk si a. Thil ngeiawm tak a tling thei a ni.
3. Sairang to Vairengte Highway:
Kumin chu Highway kawng chhe rual thup mai kha kan tuarin kan buai phah hle mai. Khang kawngpui siam lai hun vel a, Mizoram Govt. hnuaia Monitoring Unit a awm ngei ten an sawi dan chuan, “Vai Company (Sadh Guru) Contract kha kan ngam lova, kawng siam dan te chu a inthuah chhawn dan (a layer) a awm vek a. Ti tha tura kan report in, kan hotute Govt. lam khan pawi an ti tlat lova. Company kha kan monitor phak lo a ni,” an ti.
Sairang leh Kawnpui inkar mai te kha han sawi ila. An siam zawh hlim chuan a zauin a mam nuam viau a, Tlan pawh a nuam. Mahse Bitumen kha Emerson hlang nge a nih a, Fur ruah tuiin a chiah zawp rang hle a. Tin, Seal coat loh a nih hmel a. Bitumen tha, Viscocity grade (V G) sang tak chu an hmang lo hrim hrim. Tunlai hian, kawng siamtute hian kawng awlsam an zawng a, a chhe hma hle.Tui ngam lo Bitumen dal hman hi kawng lah hi a khuar bing in, a thuk kak zel a, motor ke in a dai fuh palh chuan shock obsorber a sawi bawih thei zu nia.
BOULDER Phah loh:
Sairang leh Kawnpui inkar kawng a dai kawi hnu khan kawng siamtuten an tihduhdahzia a rawn lang ta a. Kawng a dai kawi theihna chhan chu boulder Mizo Lungthu tiat leh a aia lian kha an lo phah lo reng reng a, a tang thei lova, a kawi ta vek mai a ni. A siamtu Company leh a monitoring-tu department leh a sawrkar kha an mualpho hle. A zahthlakin eiruk vang a ni leh bawk. Mipui zingah kawng veitute chuan an hmu tlang vek a. Sawrkar thar tan khan han siam that sen rual a ni lo. Kuttum tiat, Luidung tiau mum inkamki thei miah lo kha an metal hnan ta ri ngawt a. An Bitumen hman lah hi a dal em em a… tui a ngam lo a, a dur/thil rual ta thup mai a ni… A tha chin (standard ) chu VG (viscocity grade) sang deuh chu hmang se kum thum tal te chu daih tur a ni Mahse Mizorama an hman hi tuiin a chiah zawp duak theih avangin tui hi a ngam lo em em hian a dal hle tih a lang reng. Tui furin a’n chiah a, side drain-ah tui a kal vek thin lo pawh hi pawi tak a ni. Full load-in an dai a, a VG grade a chhiat em avangin a dup a, a dai kawi ta vek thin a ni. A hnuaiah boulder a lo awm bawk si lova. Mipui hian thil titha lotute chu kan hre kar tur a ni. Thil dik lo titute hi kan chhinchhiah thin loh avangin hlemhletna a zual thin a ni. (Jacob 4:17. Miin thil tha tih tur hria ti lo chu (a tan) sual a ni. Heng thil tha lo titute avang hian… Mipui sang tam takin harsatna kan tawk a. Kan buai a. Sum leh pai kan hloh nasa tih hi kan hre tur a ni. A bul ngaihtuah peih tak tak si lovin, sawrkar lai kan dem phah a. Sawrkar thar tan khan Season khata siam that vek sen pawh a ni lo. Tun lai Alkatra Bitumen hi UT hun lai vela kan hman ai khan a tui sa si, a chhe fe zawk a. Emersion an ti. Siam tuiril a nia. A VG grade a chhia a. A hre chiangte sawi dan chuan UT laia Alkatra Tlang thei Chhuan vak ngai kha a tlo ber a. A man a tlawm zawk bawk a. Tuiin a chiah tlang ve thei lo a ni.
Side Drain: Mizoramah ruahtui a tam a. Kawng siam hi Tuihawk kawng bo. Kawng laia a luan loh nan Side drain hi siam hmasak phawt a, kawng surface level dik taka siam leh ni thin se, a tha hle ang. Side drain aiin kawng surface a hniam thin a. Pawisa tam tak sengin kawng kan siam a. Kawng thar siam leh dawn in, siam zawh thar lo chhe leh thuai thin hi kan inhnangfak theih lohna chhan a ni. A pawi hle mai.