Mizoramin ni tin mamawh leh bungrua a lakluhna kawngpui pawimawh, Kolasib leh Aizawl inkar kawng a chhiat avangin tipper enkawltute an hnatlang mek a, kar leh lamah pawh chhunzawm an tum.
Kawng siama hnatlangte hi Mizoram Tipper Association, District Headquarters, Kolasib te an ni a, Khamrang YMA te’n an pui bawk. June ni 26 leh ni 27-ah khan an hnatlang a, chhunzawm zel an tum a ni.
Pawisa leh motor an thawh a, lung an lei a, kawng chhe zual laia lung hi an vawm khawm a ni. Mi 100 vel an hnatlang thin tih an sawi a, hnatlangte ei leh in man tur an thawh khawm bawk.
‘Siam a ngai em a, kan thiam danin kan siam ta mai a ni. Kawng chhia hi a tuartu kan ni a, kan chet mai a ngai kan ti a,’ an hruaitute chuan an ti.
Chak zawka hna an thawh theih nan ni hnih chhung hian lirthei an dang a, an hruaitute chuan an lirthei dante hian an hrethiam a, an thlawp tha niin an sawi. An mi dante zingah hnatlang ve nghal te pawh an awm thin tih an sawi bawk.
Kawnpui leh Sairang inkar kawng an hma a, hmun 10 chuangah lung hi an vawm tawh tih an sawi. A chhe zual lai an la hmabak mek tih an sawi bawk. Lung an vawm khawm bakah excavator (JCB) hmangin kawng an hai bawk.
Kar leh lamah pawh hnatlan an la tum tih an sawi a, lirthei pawh dan zel an tum thu, an phak ang tawka thaa an siam hma chu lirthei hi dan rih an tum thu te an sawi.
Kawng siamin tipper enkawltute hnatlang
