Mizoram ei bar lakluhna, National Highway-6 Bairabi to Aizawl via Sairang kawngpui, tunhnaia PWD-in a thuamthat hna an thawh chu Supply minister B Lalchhanzova chuan Inrinni a hmunah a enpui.
Furpui kan hma chhawn dawn avangin, chumi atan chuan ei leh bar lakluh kawngah Supply department chu theihtawpin a inbuatsaih a, ei leh bar leh kan mamawh dangte lakluh tur awm mah se, kawngpui ber a that loh chuan harsatna lian tak kan tawh dawn avangin PWD minister Pu Vanlalhlana nen an inbia a, sawrkar hmasa hun ata tawh kumtina kan harsatna lian tak, NH No.6 kawngpui chhiat vanga harsatna tawh thin chu pumpelh turin theihtawpin an inhmakhua tih a sawi a ni.
“Supply minister tan chuan kawngpui a chhiat hian mut a tui thei loa, lei a chhia tih thawm hriatte hian rilru a hah nghal mai thin. A chhan chu, kawngpui hi kan chak lakna leh kan ei bar lakna ber a ni tlat rih a. Kawngpui that leh that loh hi mutmawh hnarmawhah kan nei lo thei loa, a hmun ngeia PWD-in ngawrh taka kawngpui siamthat hna leh lei siamthat hna an thawh enpui ve hi ka bat niin ka hria a ni,” B Lalchhanzova hian a ti.
Kawnpui atanga Khamrang inkar chainage km. 118 to 133 chu SadGuru Construction Company enkawl a ni a 2025 June thleng enkawl tur an nih laiin, contractor hian an enkawl chhunzawm that loh avangin Mizoram PWD-in a thuamthat hna an thawk mek. New Khamrang atanga Buichali thleng chainage km. 133 to 147.8 chu 2021 November khan NHIDCL hnena hlan a ni tawh a, harsatna hrang hrang vangin hma an la chak tawk loa, a enkawl kawngah state PWD an inrawlh a ngai leh thin a. Tunah hian NHIDCL-in cheng vaibelchhe 22 vel sanction an nei thar leh mek a, he kawng enkawl hna hi an kutah a awm leh dawn tih minister hi an lo hrilh. Helai hi Ratna Company kutah pawh dah a lo ni tawh a, hna an thawh chhunzawm hleihtheih loh avangin tun dinhmunah NHIDCL hnuaiah contractor dang dap leh mek a ni a, chutih laiin furpui kan hma chhawn dawn si avangin PWD-in thawmthat hna hi an thawk leh mek. Buichali leh Sairang bakah Sihhmui peng inkar pawh NHIDCL-in an thawk mek bawk.
Tunhnai khan Bairabi lei chu a kalkhang leh a chhuat thenkhat a chhia a, PWD hmalaknain thuamthat nghal a ni. Supply minister hian a hmunah kalin siamthat a nih dan a enpui a. Kawng siamthat a tlawhnaah hian Kolasib bialtu MLA, Assembly deputy speaker Lalfamkima leh PWD hotuten an tawiawm a ni.
Kawng siamthat hna thawh mek Supply minister-in a hmunah enpui
