Kolasib district huamchhunga kawngpui chhia siam mekah chak leh hlawk zawka siam a nih theihna’n lirthei tlan theih loh tura kawng khar hun chhung tih sei an duh tih Mizoram Tipper Association chuan an sawi.
Mizoram Tipper Association (MTA) Kolasib District hruaitute chuan National Highway-6 huamchhung Thingdawl leh Buichali lei inkar kawngpui chhia chungchangah Thawhtanni khan Kolasib district bawrhsap John LT Sanga an hmu a. Kolasib leh Buichali inkar kawngpui a chhiat nasat avangin lirtheia eizawngtute leh khualzin tan harsatna tam tak a thlen tawh dan an hrilh. Kawngpui chhia avang hian lirthei a chhiat tam tawh bakah hun leh tha tam tak an khawhral thin tih an sawi a. Kawngpui siam nana ni khata darkar hnih chhung kawngpui khar (block) tum chu reilo an tih thu sawiin, chak zawka hna thawh a nih theih nan ni khatah darkar 4 tal khar an duh thu an thlen a, zirlaite school kal hun tibuai lo tura ruahmanna siam an duh tih an sawi bawk.
MTA Kolasib District chuan tunkar Thawhlehni atanga chhiara ni thum chhunga kawngpui siam mekah hmasawnna a awmlo a nih chuan chak zawka hna a kal theihna’n NH-6 chu lirthei khalha eizawngtute leh lirthei neituten an zawh lohna’n hma lak an tum tih Kolasib district bawrhsap leh SP an hrilh a ni.
Kawng siamthat ran nan kawng khar rei turin ngen
