Joint YMA Zobawk chuan an lo tum lawk tawh angin April 16 zing dar 6.00 atang khan an huamchhungah total bandh an huaihawt.
Jt. YMA Zobawk hian an khaw chhunga National Highway-2 laih chungchangah thuneitute an ngenna in awmzia a neih loh bakah an duh anga hna thawh a nih loh avanga total bandh hi siam an ni tih an sawi.
Total bandh neih tum tih hriat avang hian kawng siamtu company NHIDCL chuan tunkar Thawhlehni atang khan hna thawk chhunzawmin khawl pawh dah belh mah se, Joint YMA Zobawk hruaituten vawi tam an lo ngen tawhna chuan awmzia a neih ngai loh avang leh tunhma atang tawhin lungawiloh lantir an tum avang chauha hna an thawk thin chu an hrethiam tawh lo tih an sawi a ni. Total Bandh an neih hian awmzia a nei lo a nih chuan hmalak zel dan tur ngaihtuah an tum tih an sawi bawk.
Total bandh hian medical duty, bawnghnute sem, force lam duty, official duty, zirlai exam tur, Fire & Emergency Services, damlohna avanga damdawi in pan ngai, thihna avanga kal chhuah ngai, media leh PHE tui sem a huam loa; Zobawk khaw chhunga sumdawnna hmun, zirna in leh sawrkar pisa chu khar vek niin, ram lama hnathawk turte pawh tumah chhuak lo turin an inngen a. Boruak duhawm lo thleng a awm thu hriat a ni lo.
Kawng siamtu laka lungawilo Zobawk-ah total bandh nei
