Aizawl district huamchhungah kawngpui hrul, a bikin kopang lam lai rih lo turin district magistrate chuan mipui a hriattir.
Aizawl district magistrate thuchhuak chuan, kuminah ruahtui tlaa leimin leh chhiatna thleng tam zawk chu mihring siamchawp (man-made) atanga thleng a ni, tiin, hengte avanga chhiatna thleng thin laka Aizawl district mipui him theih nan danin thuneihna a pek angin lei laih leh kopang laih chungchangah khapna a siam tih a sawi.
Aizawl Municipal huamchhung ni lo, Aizawl district chhunga national highway, state highway, khawkar kawng leh khawchhung kawng (internal road) hrulah mi tumahin lei laih, a bikin kopang lam laih phal a ni lo tih a sawi a. Hei bakah hian kawng thlang lam laih pawh leivung a tam dawn chuan khap tel a ni tih a sawi. Khapna hian national project leh state project kal lai, sawrkar atanga phalna neite erawh a huam lo tih a sawi a ni.
‘Kawngpui metre 100 huamchhunga lung hal (blasting) chuan kawngpui bula lei a tinghet loa, hei hian leimin leh chhiatna nasa zawk a thlen theih avangin permit nei lo tan lung hal khap tlat a ni,’ a ti bawk.
He thupek zawm lote chu Section 223 of BNS hmanga hrem an ni dawn tih a sawi a. Thupek hian chhuah a nih atanga thlahnih chhung a huam dawn a ni.
Kawngpui hrul lai rih lo turin mipui hriattir
