Kawnpui leh Sairang inkar kawngpui chhe rei lutuk vanga tuar nasa truck khalhtu intelkhawm pawl chu High Court-ah an zualko a, ngaihtuah zui a ni dawn.
Mizoram Truck Drivers Association (MTDA) chuan an general secretary hmingin Gauhati High Court-ah tunhnai khan public interest litigation (PIL) an thehlut a. Mizoram sawrkara PWD leh FCS&CA bakah Ministry of Road Transport & Highways, NHIDCL leh Kolasib district Competent Authority for Land Acquisition chu an khin zingah an tel
High Court hian Nilaini khan PIL thehluh hi ngaihtuahin a pawm a, kar thum hnua ngaihtuah leh turin a dah.
MTDA aiawha ding ukil chuan court hmaah hian Mizoram chak lakluhna ber National Highway 306 & 06, Kawnpui – Khamrang – Sairang chu a chhe hle a, bungraw phur truck tan tlan hleihtheih loh khawpa a chhia hi state mipuiin an tuar nasa a, truck khalhtute pawhin an tuar hle tih a sawi a ni.
Court hnenah hian helai kawng hi state PWD-in NHIDCL hnenah Ministry of Road Transport & Highways thu angin a enkawl zui leh thawmthat hna chu 2025 January khan an inhlan fel tawh thu pawh sawi a ni.
Heti chung a, kawngpui a chhe em em reng chu, siamthat thuai a nih theihnan PIL hi thehlut an ni tih a sawi.
High Court hian MTDA-in a khinte insawifiah hun atan kar thum a pe a, hemi hnu hian ngaihtuah zui a ni ang.
The Aizawl Post-in a zawhnaah MTDA president H laldingliana chuan, helai kawngpui hi siam ni anga sawi awm reng mah se, a la tha lo reng a, an pawl leh pawl dang pawhin hnatlangte koin a thawmthat hna an thawhpui thin chungin, beisei anga siamthat a ni thei chuang loa, Silchar lam pan tur truck ruak pawh helai hmunah hian ni hnih thum tan chang an nei a, truck chhia leh tlu vangin tlan tha ngam loa ding an awm fur bawk a, a then loan-a truck la an nih bawk avangin tlan lo thei lo an awm nen, hetiang hian hma an la ta a ni tih a sawi.
An ni bakah hian Mizoram Truck Owners Association pawh court-ah hian an zualko mek tih a sawi bawk.