Chief minister Lalduhoma’n union minister of road transport & highways Nitin Gadkari a hmuh hnu lawkah, Nitin Gadkari chuan Twin Tube Uni-directional Aizawl Bypass Tunnel thawhna tur sum cheng vaibelchhe 1313.28 a sanction thu chief minister a rawn hriattir, tiin Mizoram sawrkar thuchhuahah tarlan a ni a.
He leiverh kawngpui hi National Highway No. 6, Sairang leh Phaibawk inkar, a lei verh thui zawng km 2.5, a luhna (approach road) km 2.1 a thui, a vaiin km 4.60 a ni. He kawngpui hian khawpui chhunga lirthei veivak tam lutuk chu nasa takin a ti ziaawm dawn a; Sairang leh Phaibawk inkar kawngpui thui zawng pawh km 22 zetin a titawi dawn bawk niin thuchhuahah chuan tarlan a ni.
He project hi, nikum July thlaa PM GatiShakti hnuaia Network Planning Group thukhawmin MoRTH hnuaia cheng vaibelchhe 15,683 senna tur project 5 a ruahman zinga pakhat a ni a. Project dangte hi Maharsashtra-ah pahnih leh Uttarakhand leh Kanpur-ah te pakhat ve ve a ni. Mizorama project thawhna tur sum hi project 5 tana sum ruahman atanga 8.37% chauh a ni a; state dangte project chu a liantham viau dawn tih a hriat a ni.
PM GatiShakti hi national master plan a ni a, ministry 16 huamin MoRTH pawh hi a tel a. He scheme-in a tum ber chu, veivahna leh bungraw thiar velna atana senso (logistics costs) a tam thin lutuk tihziaawm, a ni ber a. Chutiang atana sum senral thin hlutzawng chu mithiamte chhutchhuah danin GDP atanga 13% lawih a tling a; hei hi a sâng hle a ni.
Aizawl khawpui chhung lailum lamah sumdawnna hmunpui leh sawrkar hmunpui a awm vek avangin khawpui chhung lailum lam pan suau suau a ngai thin a, chutih laiin bungraw phur lirthei lian an lo inrawlh ve reng bawk si nen, ni tin lirthei a pung chak in, kawngpui siam belh awm bawk si lo nen, kawngpui awmchhunin a zir loh tehreng nen, rem leh rem lovin traffic signal light hman kan lo tum ve phet bawk nen, traffic tawt tihziaawm aiin tih tawt belh dan kan zawng ngar ngar ni maiin a lang. Chuvangin, sawrkar thar hi chuan ngaihtuahna thar seng se, khawpui vettu ring road kan mamawhzia hi sawrkar laipuiah thlen se, PM GatiShakti scheme hnuaiah hian a leng vekin a rinawm.
Kawngpui
