Kawnpui – Sairang kawngpui chh zual thawmthatna atan state sawrkarin cheng nuai 100 a ruahman a, Mamit panna kawng chhia thawmthat atan sum dah hran ni bawkin, thawmthat hna hi July 21 zan atanga tan nghal tura tih a ni.
Thawhtanni khan chief minister Lalduhoma hoin PWD minister Vanlalhlana, PWD official-te leh Finance department hotuten tunlaia kawngpui chhe zual thawmthat dan tur an sawiho a. Bungraw phurtuten harsatna an tawhna lian ber Kawnpui -Buichali -Sairang kawngpui chu NHIDCL kuta awm, state sawrkar mawhphurhna ni tawh lo mah se, nitin chak lakna pui ber a nih avangin, nikum lama sawrkarin a lo hnawh tawh ang khan, kuminah pawh a zualpui hi hnawh leh nise, an ti a. Hnathawhna atan cheng nuai 100 ruahman nghal a ni.
Darlak – Tuidam inkar kawng thar zawk sialtu contractor an tlakchhiat avangin an contract tih tawp loh theih lohin a awm a. Tender thar chhuah dilna sawrkar laipuiah a awm mek a, he dilna hi chak taka umzui a ni tih sawi a ni. A helna, kawng hlui, tuna hman mek chu PWD-in a zualpui thawmtha se, tiin, a thawhna tur sum nuai 20 ruahman a ni.
Mamit – Bairabi kawngpui chu a grade tha mah se, khuar (pot holes) a tam thung a. He kawngpui hi hman theiha a awm reng turin a tul lai apiang thawmthat nise an ti. He kawngpui hi engemaw thulha Kolasib lam kawngpui a pin pawha hman theih a ni. A thawmthatna atan cheng nuai 65 pek chhuah remtih a ni.
PWD secretary kaihhruaiin Coordination Committee din a ni a. An ni hian hmanraw mamawh lakhawmin Thawhtanni – July 21 zan atangin hna tan nghal tura tih an ni a. NHIDCL pawh na zawka nawr nise, sawrkar laipuiah a tul anga hriattir nise an ti bawk.
Kawnpui-Sairang kawng chhiasiamna atan nuai 100 ruahman
