Kawppui te hnena sawi tur

Ngaihzawng leh kawppui te hnena sawi loh tur ni a relationship lama mithiam te sawi chi hrang hrang kan rawn tarlang nual tawh a, tun tum chu kawppui te hnena sawi ngei ngei chi ni an sawi te kan rawn tarlang ve leh thung.
Inngaihzawnna emaw nupa nun emaw-ah hian titi duna, thil sawi duh fo hi thildang zawng aia pawimawh niin an sawi. A chang chuan pehhel loa sawitlang rawt mai atana tha zawk te pawh a awm thin. A hun laiin sawi hrehawm leh nuam lo ni thei mah se, a hnua kan that tlanna tur te a lo ni leh zawk thin si a. Khai le in inkar boruak a lo hrisela a lo that zawk nana kawppui te hnena sawi ngei tur ni a mithiam te sawi te kan rawn tarlang e.
1. Nupa nun hman dunna kawngah i châk lo a, a mood-ah i awm lo, anin a rawn beisei riau si che a. Mahse, chutiang hunah chuan a duh ang chu peih lo chung chunga tihpuitlin sak tum talh kher a tul lo. A mood-a i chen loh thu sawi mai kha a pawina a awm lo, i sawi ngei tur zawk a ni.
2. In inkarah chuan eng nge i beisei tih te i hriattir ngei a tha. A hnen atangin eng nge i beisei tih te, i hnen atangin eng nge a beisei tih te pawh i hriat tel a tha.
3. Ani nen chuan in inzui rei tawh viau a ni thei a, mahse, midang, i kawppui awm mi tak i tawng ta si a. Chutiang chu a nih pawhin hrilh mai tur a ni. A rilru tihnat i hlauh avangin inthen i duh chhan te alak atanga zëp tlat tur a ni lo, kha leh chen in lo inzui ve tawh a, a chhan hriat chu a phu ve a ni.
4. Kawppui te karah sum leh pai hmanna zêp ruk neih hi a pawi thui thei hle. Kuhva leina tih vel mai mai thlenga inhriat tawn thlip thlep te chu tul ber pawh a ni lo, mahse, tlereuh lam emaw, kawr leh bungraw lam a ni emaw, kan pawisa hmanna chu kan kawppui te kan hriattir ngei tur a ni.
5. I lungawi lohna te hriattir rawh. A chhungte lakah a ni emaw, a thiante lakah a ni emaw, eng emaw lungawi lohna i neih chu tha takin sawipui la, chutiang harsatna chu in pumpelh theih dan tur te ngaihtuahpui tur chein sawm rawh.
6. I duh zawng leh duh loh zawng te, nuam ti zawng leh ngaihtheih loh zawng te, tui i tih leh tih loh te, i ngainat leh ngainat loh zawng te te hriattir rawh.
7. A chang chuan nangmaha awm falna hun neih te pawh i duh mai thei, chutiang hunah chuan tha taka hrilh mai tur a ni.