Kum 1986 khan Mexico chuan ‘Khawvela ennawm ropui ber’ Fifa World Cup an thleng a. Kum 1982-ah lo indo tawh Argentina leh England te chu quarter-final-ah intumin, an boruak a lian hle. Khawpui lian Mexico City, Estadio Azteca Stadium-a quarter-final hmuhnawm zetah hian Diego Maradona goal sawi hlawh pahnih hmangin Argentina chuan hnehna pawimawh tak an chang a. Argentina hi World Cup-ah a vawi hnih nan an champion zui ta nghe nghe.
He inkhel hmuhnawm takah hian minute 51-naah Maradona chuan ‘Goal tenawm ber’ ti hiala an sawi zui t^k reng a thun a, a kutin a hnek goal. England tantute leh khawvel mipui tam takin ‘goal tenawm ber’ ti hialin sawi mah se, Maradona hi chuan ‘Pathian Kut’ (hand of God)’ tiin a sawi ve tlat thung. Dik hlel taka goal a thun hi Argentina tana a khelhpuite pawhin lawmpui nach^ng pawh an hre lawk lo hial a. “Lo tlan vat vat ru, an hre chhuak palh ang e”, tiin a thiante hi a goal thun lawmpui tura a nawr hial an ngai a ni awm e. Chuan, England lamah minute 51-naa a goal tihluh hi ‘Hand of God’ tiin a lar zui ta reng a ni.
Maradona hian ‘goal tenawm ber’ ang hiala sawi a thun atanga minute li hnu lekah England player te hual vel karah ropui takin a tal chhuak a, minute 55 naah goal ropui chungchuang a thun zui leh zat. Khelmual chanve aia thui atangin ball a khalh tan a. England player engemawzat a bum tlang hnuin, si nghak Peter Shilton a bum zui leh a, an goal hnihna a thun. Hmahruaina goal kha ‘Goal tenawm ber’ tiin an sawi zui a. England laka Argentina goal hnihna a thun erawh chu ‘Goal ropui ber’ tiin sawi zui a ni ve ta thung a. ‘Goal of the Century’ a thlan ni zui ta hial. He goal ropui hi khami tuma England si nghak Peter Shilton ngei pawh khan kum 2002 khan ‘Goal of the Century’ atan hian i he lovin a vote ve hmak bawk.
A goal hnihna hian, a hnek goal avanga a mualphona a hliahkhuh hneh hle.
Argentina lakah si hnih an phurh hnuin England tan Gary Lineker chuan minute 81-naah goal thunin an si phurh a sut then na a, indona muala an hneh Argentina lakah 2-1 a tlawmin, semi-final an lut zo ta chuang lo.
Argentina laka England an tlawm tum khan England midfielder Steve Hodge chuan inthl^kna pindan panna kawngah Maradona kawr hi a inthlengpui a. Nottingham Forest, Aston Villa, Leeds leh Tottenham midfielder, England tan vawi 24 khel tawh Hodge hian Maradona kawr hi hralh mai lo vin a dah tha ngar ngar a. Manchester khuaa National Football Museum-in man chawiin rei tak an hawh a. April ni 20 atanga May ni 4, 2022 chhung khan a duh apiang lei theih turin lilam a ni ta thung.
England an hneh tuma Maradona kawr (jersey) h^k hi a tlawm berah Pound maktaduai li (4), India pawisaa Rs. 397,120,000/- velin hralh theih an inbeisei phawt a. Lilam a nih chhung hian Maradona kawr hi Sotheby’s London showroom-ah pholan niin May ni 4, Nilaini khan an hralh fel a. An hralhna zat hi £7,142,500 zet a ni ta thung a. An hralhna zat hi India pawisa chuan Rs. 674,894,825/- zet niin, Sport lama hriat rengna tur tling bungrua hralh to ber a ni ta hial a. Kawr manto chungchuang a ni.
Maradona kawr leitu hi chiang takin an hming tarlan a ni lova, Middle East lam mi an nih thu erawh puanzar a ni. Lilam tawp dawn ruai khan Argentina atanga lei tumte chuan England an thlawk thleng hlawl a, Argentina chawimawitu Maradona kawr hi an chang hman ta lo thung. Argentina atanga lei tumtute hian kawr leitu tharte hnen atangin lei chhawn leh an dil viau na a, an hlawhtling zo lo.
Sport lama hriat rengna tur tling bungrua hralh to ber ni thin chu Olympic Manifesto -1892 a ni a. He thil hi kum 2019, December thla khan US Dollar maktaduai 8.8 (Pound maktaduai 7) in hralh a ni. Olympic Manifesto hi International Olympic Committee (IOC) dintu Pierre de Coubertin a ziah niin, kut ziak phek 14 a chhah a ni. Lilam hun hi minute 12 chhung chauh hawn a ni a. A leitu hming hi puanzar a ni lo. Baseball-a New York Yankees player ropui Babe Ruth-a jersey chu kum 2019 vek khan US Dollar maktaduai 5.6 (Pound maktaduai 4.4) zetin hralh a lo ni tawh bawk a. Heng record pahnih hi Maradona Jersey hralhna hian a rawn kh
Kawr man to
