Block Development Officer office Kawrtethawveng leh BDO quarters chu Thawhlehni khan Rural Development minister Lalruatkima chuan a hawng a. He hun hmanpuitu Information Communication Technology minister Robert Romawia Royte chuan NABARD kaltlanga sak tur Village Knowledge Center, Kawrtethawveng ami lungphum a phum a ni.
RD minister chuan hnam nihna thinlung, ram kal zel turah hnam pasalthaten an thlah kal zel tana ram an lo zuah hi hnamdangin an luah ang tih hlauhthawnna tlang atangin RD Block pahnih Kawrtethawveng leh Tlabung a lo piang tih a sawi a. Kawrtethawveng chhimlam Nghawngkawl tlanga ram neitu Pu Zahmingthanga ten a hmun atan a thlawna sawrkar an pek avangin lawmawm a tih thu a sawi. Kawrtethawveng Block hian post thar panga a kengtel a, kum 2022 khan tih fel a ni tawh tih a sawi bawk.
BDO leh a staff-te chu VC-te thurawn lakna leh ngampa taka an len theihna ni a, inhawng taka awm turin a chah a ni.
ICT minister pawhin an department hnuaiah Mizorama Center 15 zinga center pakhat ni turin Village Knowledge Center, Kawrtethawveng RD Block office behchhana dah an ni chu khaw mipuiin tangkai taka an hman a duhsak tih a sawi.
Kawrtethawveng RD Block hi kumin January 20 khan hawn a ni a. Kawrtethawveng BDO office hi MGNREGS leh MzSLRM hnuaiah cheng nuai 195. 75 sengin 2022 November 28 khan sa tanin, kumin September 30 khan sak zawh a ni. Zopa chhiara chawng li a ni. BDO quarters hi nuai 98.24 sengin sak a ni a, a sak hna hi Kawrtethawveng RD Block-in a thawk a ni.
Kawrtethawveng BDO pisa hawng
