Kelawnga zing exer laa tlan te hi pheikhawk chhung dup (sneaker) bun chunga tlan aiin a tha zawk niin mithiam ten an sawi.
Doctor bakah trainer leh runner ten kelawnga kal leh tlan hian pheikhawk chhung dup bun aiin ke ruh tihhliam palh a hlauhawm loh zawk niin an sawi a, a chhan chu mihring kephah hian amahin shock absorber a nei, an ti.
Pheikhawk chhung dup bun chunga tlan chuan kan keartuiin lei kan rap hmasa ber a, hei hi tlanna tur chi pheikhawk pangngai bun emaw ke lawnga tlan emaw aiin a tha lo zawk niin an sawi. Running shoe emaw ke lawnga kan tlan chuan kan ke phah hmalamin lei a rap hmasa ber zel a, kan kephah hmalam chu kan keartui aiin hetiang shock dawl zo zawk tura duan niin Harvard University-a evolutionary biology professor Dan Liberman chuan a sawi.
‘Born to Run’ tih lehkhabu ziaktu Christopher McDougall chuan tunlai pheikhawk chhung dup te hian kan tlan dan tur phung pangngai a tihdanglam avangin inhliam pawh kan tam phah niin a sawi a, tunah chuan khawvel hmun hrang hrang runner ten kelawng emaw, pheikhawk hnuai pan chi buna tlan an ching tawh zawk niin a sawi bawk.
Kelawnga tlan hi India-ah pawh a lar ta hle niin Dr Sanjay Hegde, orthopaedic surgoen chuan a sawi a, “Siamtuin a siam sa, mihring ke hi tlan nan chuan a tha ber a ni,” a ti.
Running coach Dharmendra D chuan, “Thlan nana pheikhawk bun thatna awmchhun chu zum leh hriam lakah a veng tih chauh a ni. Chuti tih lohah chuan pheikhawk bun loh hi a tha ber zawk, pheikhawk kan bun hian kan ke natural biomechanics a tibuai zawk a, chu chuan ke ruh na te a siam ta thin a ni,” a ti ve bawk.
Ke lawnga tlan a tha
![](https://theaizawlpost.org/wp-content/uploads/2023/02/ke-1.jpg)