Keilungliaha thlawh tum tir dan dap
Champhai Keilungliah Tuikhuaha tuia tum thei chi thlawhna tum tir theih dan dapin Thawhtanni khan adviser to chief minister (Technical) Er H Ginzalala hoin GAD hnuaia Civil Aviation Wing hotute leh sea plane company-ten an enho.
Keilungliah tuikhuaha sea plane service tir tum hian Champhai North bialtu MLA ni bawk Er G Ginzalala hian hma a la a. Tourism industry tihpuitlinna kawngah leh hmasawnna hnathawh turah Champhai-in hmunhma a neih that zia hria in, Keilungliah tuikhuahah pawh MLA hmalakna hian pedal boat pali dah a ni a, sea plane service tir tur pawh hian hma la in, Zoram hmun hrang hrang an zirchian tawhnaah Champhai baka khawpui kiang hnaivai, mipui leh khualzin tana awlsam leh inkalpawhna hautak silo chu Champhai chauh hi amphibious aircraft service tirna tur awmchhun a ni tih a sawi.
“Serlui, Tuirial leh khuarel dil hrang hrang pawh tha leh remchang awm mah se, a veivahna thui lutuk leh a chhawrtute tan a senso a hautak lutuk avangin a remchang tawk loa, Keilungliaha hi tih theihna tur hmunhma kan neih hi bawhpelh ka hlau a, sea plane neitu company hotute chahin Aviation Wing hotute leh he lamah mithiamte nen hma lak dan tur kan enho a ni,” Er G Ginzalala hian a ti.
Amphibious aircraft hi tuipui leh khawmuala tum kawp thei niin, ruahmanna hmasaah chuan mi 9 chuan theihna a ni a, hun lokal zel turah mi 18-19 chuan theihna tura hma lak zel tum a ni tih a sawi bawk.
Enhonaah hian Civil Aviation Wing hotute, sea plane lam neitu – Maritime Energy Heli Air Service Pvt. Ltd (MEHAIR) hotu leh Ministry of Tourism hnuaia thlawhna hmanga inkalpawhna tur ruahmanna – Swadesh Dhakshan-a Tourism coordinator hotute an tel a. He project-ah hian Swadesh Dhaksan hnuaia sum awm nen pawtkhawmin cheng vaibelchhe 20 vela tihpuitlin theih an inbeisei a ni.
Keilungliaha thlawh tum tir dan dap
