Central Bureau of Investigation (CBI) te chuan Aam Aadmi Party (AAP) national convener leh Delhi Chief Minister ni bawk Arvind Kejriwal chuan kum 2021 Goa Assembly election-ah khan an party candidate te hnenah Rs 90 lakh theuh pek a intiam tiin an sawi.
Heng sumte AAP nominees te hnena pek tur hi Delhi sorkar-in tuna nuaibo tak Delhi excise policy atanga ‘South Group’ te duhsakna lantirna atanga neih tur tiin agency chuan a tarlang bawk a.
Kejriwal chu kumin June thla khan CBI te chuan Lieutenant-Governor V.K. Saxena complaint denchhenin an man a, Delhi liquor policy ah thil fel lo tam tak a awm tih niin tun thlengin lung inah khungin a la awm bawk a. Court chuan he mi chngchang hi September 3 ah a ngaihtuah leh dawn bawk.
AAP te chuan CBI te thusawi chu chhang letin BJP te chuan an agency te katlangin thudik lo leh behchhan nei lo te chu headlines siam nan an aupui zui zel an ti ve thung a.
“He rama corrupt politician tin te chuan BJP an zawm tawh a. Mahse, an candidate tena inthlan lo awm tura security deposit an neih te chu an chan vek tawh dawn” tiin an sawi bawk.
CBI tena court hnena thu thehluhan an siam hi a palina ni tawhin supplementary chargesheet pali an siamanah hian Kejriwal bakah midang panga AAP MLA Durgesh Pathak, businessman Amit Arora leh Aurobindo Pharma dicrector P. Sarath Reddy te pawh an hming tarlan tel an ni bawk a.
“Bribe money a vaiin Rs 45 crore lai chu AAP te hnenah Arvind Kejriwal duh dan angin thawn a ni” tiin senior advocate leh Special Public Prosecutor D.P. Singh chuan a sawi.Singh chuan AAP comminication in-charge hlui Vijay Nair chuan ‘South Group’ te nen inbiakna neiin inremna a siampui tiin a sawi bawk a. CBI te chuan investigation neihbelh an mamawh tawh lo va trial hmachhawn turin an inpeih tiin an sawi bawk.
Delhi Chief Minister Arvind Kejriwal chu lung in ah la tang mekin a case hrang hrang te a tahtawla ngaihtuahin a awm mek zel a ni.
Kejriwal-an Rs 90 lakhs pek tiam ti
