Directorate of Enforcement (ED) chuan Delhi Chief Minister Arvind Kejriwal chu court-in liquor policy case-a bail a pek ni la laah mipui hriatah a sawi chhe nghal tiin a sawi.
Kejriwal lawyer te chuan a tul a nih chuan Government Minister tena Kejriwal bail order chungchanga an thusawi te Supreme Court hnenah affidavit an theh luh ve mai tur thuin an chhang thung.
Bench of Justices Sanjiv Khanna leh Dipankar Datta te hmaah dingin Solicitor General Tushar Mehta, ED aiawha ding chuan Kejriwal chuan a case chungchang chu remchangah hmangin mipuite chu Aam Aadmi Party (AAP) symbol ‘hmunphiah’ a vote thlak tura ngenin tichuan June 2 ah lung inah a let leh a ngai lo thei a ti a ni, a ti a.
Supreme Court chuan a hmain Delhi Chief Minister chu interim bail pe in Lok Sabha inthlan campaign theih tawp ruala June 2 a lung in a let leh turin a lo ti tawh a ni.
“Ka ngaihdan chuan system na taka demna a ni. Kejriwal hian ni 20 hnuah lung inah ka let leh a ngai a ti a. Hmunphiaha vote in thlak chuan lung in ka pan leh kher a ngai dawn lo a ni a ti a. Min vote a nih chaun June 2 ah lung in ah ka luh leh a ngai dawn lo a ti a ni. Engtiangin nge chutiang chu a thlen theih?” tiin Mehta, ED aiawha ding chuan a sawi a.
Solicitor General chuan a thusawi duhdan atang hian Kejriwal hian ‘mi special bikah’ a inngai a ni a ti bawk a. “Keini (ED) te chuan khua leh tui pangngai dan bawhchhiaah kan ngai mai” tiin Mehta chuan a sawi bawk a.
Mahse, Mehta ngenna siam chuan Justice Khanna chu tinghing eih lo thungin AAP national convenor in min vote a nih chuan lung in ka luh leh kher a ngai lovang a tih chu ‘ngaihruatna’ mai mai a ni a tihsak thung.
Judge chuan May 10 a interim bail order siamah Kejriwal chu excise policy case chungchang engmah a sawi remtihsak loh mai chauh a ni a ti thung a.
“Case chungchang a sawi tur a ni lo kan ti a. Case chungchangah engmah sawi kan nei lo” tiin Justice Khanna chuan a sawi a.
Justice Datta pawhin Kejriwal chu ni 20 ah chiah court thupek angin lung in-ah a let leh ang a ti bawk a. “Kan thupek a ni” tiin Datta chuan Mehta a hrilh zui bawk.
Kejriwal aiawha ding Senior advocate AM Singhvi chuan ED te chuan a kawi zawng vekin Chief Minister Kejriwal lakah thil an kalpui a ni a ti ve thung a.
“Mehta hian he issue-ah hian affidavit a siam a nih ngat chuan Court order chungchanga Minister lawk ber ber tena thusawi an neihah affidavit ka siam ve ang,” tiin Singhvi chuan a sawi bawk.
Justice Khanna chuan court chuan thutlukna a siam tawha mipui tena sawiselna an neihah engmah buaina a nei lo a ti a. “Kan thupek leh thuremna siamah mi tu pawhin ngaihdan an nei thei a lawm, engmah harsatna kan nei lo” tiin Justice Khanna chuan a sawi bawk a. May 10-a interim bail kha a chiang tawk a ni a ti bawk a.
“Kejriwal hun kan pek a chiang hle. Kan thupek kha apex court thupek a ni a, rule of law behchhan a ni. Tumah duhsak bik kan nei lo va, interim bail a chhuah kha a dikin kan hria a, thupek kan siam mai a ni,” tiin Justice Khanna chuan a sawi bawk. Court chuan he case hi a ngaihtuah zui zel a ni.
Kejriwal chungchang ngaihtuah zui zel
