Kel thih belh tawh rih lo

Hri vanga kel thihna Thinglian leh Lungpho-ah kel
a thih belh rih lo a, he hrileng hi a zia tanah ngaih a ni.
AH&Vety department chhinchhiahna enin, July ni 7-ah kel a la thi a, chumi hnu-ah a thi tawh lo. Hri veite pawh enkawl dam an ni tawh.
Serchhip district-a Thinglian leh Lungpho khuaahte hian Mizoram sorkarin kel a sem a, rei lo teah an dam lo a, kel lakluh thar bakah Thinglianah chuan a lo awm sate pawh an thi.
July ni 7 thleng khan Thinglian-ah kel 85 a thi a, Lungpho-ah 43 a thi. Thinglianah hian kel lo awm sa pariat an thi tel.
Thu dawn danin, kel hian Peste des petits ruminants (PPR) an vei a, June thla kha a nasat lai niin, thla tawp lamah a zia tan a, thla tharah a zia ta zel a ni.
May ni 28-ah Assam atanga kel lakluh hi khaw pahnihah hian phurh thlen an ni a, Lungpho-ah chhungkaw 50-in, Thinglianah chhungkaw 82-in an dawng. Mahse rei lo teah kel hi an dam lo ta a, a lo awm sate pawhin an kai ta a ni.
Kel lakluh hi an dam lo vek a, thu dawn danin, khaw pahnihah hian 13 ve ve enkawl dam an ni.
Heng khaw pahnih bak khaw dangah hri hi a darh lo nia hriat a ni a, Thinglian bul lawk Hmunzawlah pawh kel vulh an awm a, mahse an him tih thu dawn a ni.
AH&Vety department lam chuan fimkhur tura mipui an chah nghal thu an sawi a, vawk natna anga awlsam taka darh nghal chi a nih loh thu te, vawk anga a sa put darh nghal a nih loh avangin a hri pawh darh zung zung lo tura ngaih a nih thu te, Thinglian leh Lungpho bak khaw dang a thleng lo nia hriat a nih thu te an sawi. Serchhip district-a kel vulhna khaw thenkhatah chuan hri danna pek nghal a nih thu te, PPR hi hri danna (vaccine) a awm thu te an sawi bawk.