Kendrick Lamar & SZA ‘Luther’ a Hot ber

Kendrick Lamar & SZA ‘Luther’ a Hot ber
Kendrick Lamar leh SZA hla hit ‘Luther’ chu Billboard Hot 100 (singles) chart-ah a No.1 a, he chart-a a zawna kar riat a No.1-na a ni ta a, Lamar leh SZA tan he chart-a an hla No.1 ni rei thei ber a la ni ve ve.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio & official video), radio airplay leh sales data te chu tehna pawimawh a ni.
‘Luther’ hian kar khat chhungin stream maktaduai 22.7, radio airplay ngaithlatu maktaduai 63.1 leh sales 2,000 a la nei thei a, hei hi a kar riat nan chart-ah a No.1 pui leh ta a ni.
Drake ‘Nokia’-in stream maktaduai 23.4, airplay ngaithlatu maktaduai 19.7 leh sales 8,000 nei lehin No.3 atangin No.2-ah a insawn, Drake hian Hot 100 chart-a top 2 kai thei hla 24 a nei tling ta a, The Beatles leh Mariah Carey lehpelin Top 2 hits ngah ber record a siam ta a ni.
Chart No.1 hlui Lady Gaga leh Bruno Mars ‘Die With a Smile’ chu No.2 atangin No.3-ah a tawlh a, he hla hi chart-ah a zawn lovin kar nga a No.1 tawh a ni.
BigXthaPlug ‘All the Way’ featuring Bailey Zimmerman chuan stream maktaduai 24.1, airplay ngaithlatu 30,000 leh sales 8,000 neiin No.4-ah a debut a, he chart-a BigXthaPlug hla top 10-a lang thei hmasa ber a ni a, Zimmerman tan a pahnihna a ni ve thung.
Chappell Roan ‘Pink Pony Club’ chu No.5-ah bawk awm lehin, chart No.1 hlui Shaboozey ‘A Bar Song (Tipsy)’ chu No.4 atangin No.6-ah a tawlh ve ta bawk.
Alex Warren ‘Ordinary’-in stream maktaduai 20.4, radio airplay ngaithlatu maktaduai 8.3 leh sales 6,000 neiin, No.14 atangin No.7-ah a invawrh a, he chart top 10-a a hla lang thei hmasa ber a ni.
Chart No.1 hlui Teddy Swims ‘Lose Control’ chu No.6 atangin No.8-ah a tawlh a, he hla hi chart-a kar 86 a lang tling tawh a, he chart-a hla lang rei theiah palina niin, Glass Animals ‘Heat Waves’ (kar 91), The Weeknd ‘Blinding Lights’ (kar 90) leh Imagine Dragons ‘Radioactive’ (kar 87) te chiah a pha lo.
Morgan Wallen ‘I’m the Problem’ chu No.2 atangin No.9-ah a tawlh a, Benson Boone ‘Beautiful Things’ chu No.11 atangin No.10 a kai thar ve leh ta bawk.