Kenya-a lungawi loh lantirnaah mi 10 vel thi

Kenya-a lungawi loh lantirnaah mi 10 vel thi
Nikum atanga sorkar duh lohna lantirna kal zelah Thawhtanni khan Kenya-ah mi 10 vel thi an awm thar leh niin sorkar hnuaia human rights body chuan a sawi.
Police-in mipui thinrim pungkhawm hi an kap a, a hmain Nairobi dai, Kangemi-a Eagle Nursing Home-a thawk, Dr Aron Sikuku chuan an damdawi inah silaia kah hlum ruang pahnih an dawn thu a sawi bawk.
An damdawi in tualah hian ruang lak dilin mi thahnem tak an pung khawm zui niin a sawi.
Tun hnaia sorkar laka lungawi lohna lantir hi an ram chanchina hriat hlawh tak, Kenya-a mipui rorelna ram anga party tam tak awm theihna phuta Saba Saba (‘seven-seven’) lungawi lohna lantirna, July 7, 1990-a thleng kum 35-na champhaa huaihawt a ni.
Kenya National Commission on Human Rights (KHRC) chuan police hian uchuak takin tharum an hmang niin an sawi a. “Police hi uniform ha lo leh anmahni lirthei pangngai ni lova thawk chhuakin Nairobi, Kajiado, Nakuru, Kiambu leh Eldoret-a mi sual pawlte nen an tangho a ni,” an ti a. Police chuan an pha thung.
Mi pahnih vel ruk bo an awm thu leh mi 29-in hliam an tuar a, mi 37 man an ni bawk tih an sawi.
Zing hma tak atangin, zan lam atanga zin chhuak tawhte pawh telin, checkpoint-ah khawpui laili lut tur dan an ni a, lirthei thenkhat chauh chhuah an ni.
Sorkar hmun pawimawh – president chenna, State House leh parliament panna kawngte chu razor wire hmanga dan a ni a. Sikul thenkhat an chawl bawk.
Khawpui hmun thenkhatah pung khawmte hian mei halin police-in an danna paltlang an tum a. Officer-te hian tear gas leh tuiin an phuh zui a ni.
Kenyan chanchinbu lian ber, Nation chuan lungawi lohna hi an rama county 47-a 17-ah lantir a ni tih an tar lang.
Kenya khawchhak lam, Meru county-a Makutano khuaa shopping centre chu a kang a, meikhu a chhuak nasa hle a. Ol Kalou khuaa mi pakhat kah hlum niin pakhat kah hliam a ni abwk.
Nairobi-a Saba Saba lungawi lohna lantirna bul lawk, Kamukunji-ah pawh mipuiin thil halin police nen an innawr nasa hle.
Prime minister hlui, Raila Odinga-a che chhuak tur pawh a thul a. Ani hi Saba Saba lungawi lohnaah khan man zingah a tel nghe nghe.
Thawhtannia lungawi lohna hi a huaihawttu ber chu thalai, Gen-Z an tihte niin sorkar tha, innghah ngamna, rawng taka police chetna thlenga a titute laka hremna pekte an phut.