Ivory Coast footballer pakhat a hming tarlan loh chuan tunhnai khan Kerala state hmar lam district pakhat Malappuram District Police Chief hnenah complaint thehlutin, mihang a nihna zawna diriam leh endawng, hmuhsit a tawrh thu leh kut hial a tawrh thu a tarlang.
India chhim lama football ngaihsanna state pakhat Kerala-ah hian ramdang footballer engemawzat an lut a, he’ng zingah hian mihangte pawh an tel a, police hnena lungawilohna thehluttu Ivorian hian lunga vawm hial a tawh thu sawiin, Areekode bula tualchhung club pahnih inkhelh vuakvetah he mihang player hian a vunrawng avanga tihnawmnah a tawh mai piahlamah inkhel entu mipuiin kut an thlak hial a ni.
Areekode police station-a officer chuan player statement hi lain, tawng chungchang harsatna avangin an indawr chhung hi a rei ta deuh niin India media lamin an tarlang a, police lamin statement an lak zawhah FIR thehluh zui nghal a ni.
Footballer lo dawngsawngtu officer sawi danin khelmual chhung video atangin player chunga chemawi lo leh tharum thawhtute chu hriat theih a ni dawn a; kha thil thlengah khan hmanrua engengemaw hmangin African player kha vawm a ni a, chu mai duhtawk loin inkhel entute zinga pakhat chuan player lakah ke thawhin a pet niin police officer chuan a sawi.
Kerala-a kut tuar foreign footballer
