Kerala Congress unit chuan an state assembly inthlan lo awm turah party dang nena an thawhhona, UDF chuan bial 100 chuang an lak ngei an inbeisei.
Thawhtanni khan Wayanad-a Sulthan Bathery-ah ni hnih awh hruaitute intawh khawm, ‘Lakshya 2026’ hmang zovin state leh district hruaitu 150 chuang an tel a, assembly inthlan an hmachhawn tura chet lak dan turte an sawiho.
Intawh khawmah hian AICC general secretary atangin Deepa Das Munshi leh KC Venugopal te pawh an tel a. State President Sunny Joseph, Leader of Opposition VD Satheesan, LoP hlui Ramesh Chennithala, KPCC executive member, MP, MLA leh district hruaitute an tel.
Thiruvananthapuram MP Shashi Tharoor-a chu tun hnaia a chet danin sawi hlawh hle mah se a tel bawk a. Ani hian tun hnaiah BJP sorkar leh Prime Minister Narendra Modi-a hmalakna a fak fo avangin sawi a hlawh a; mahse, assembly inthlan lo awm tura campaign-ah nasa taka tha thawh a tum tih a sawi.
Congress hian inthlan campaign boruak siam nan January 20-ah Thiruvananthapuram-ah kawng an zawh dawn a, January 23-ah district 14-ah Sabarimala temple-a rangkachak rawkna chhuina langtlang leh chak taka chhui phutna an lantir dawn tih KPCC President Joseph-a’n a sawi.
February thlaah state pumah sorkar kal mek hlawhchhamna hrang hrangte pho chhuah nan kawng zawh lian tham tak huaihawt an tum bawk.
Kerala inthlan turah Congress-in bial 100 lak inbeisei
