Kerala-a political group te chuan BBC documentary sawi hlawh tak “India: The Modi Question” tih chu state chhunga hmun hrang hrangah an chhuah tur thu sawi chu BJP te chuan duh lo hlein Chief Minister Pinaryi Vijayan chu chhuah a nih loh nana hma la turin an ngen.
CPI(M)’s youth wing, DYFI te chuan he documentary hi an Facebook page kaltlangin State chhung hmun hrang hrangah an chhuah tur thu an puang a.
CPI(M) nena inzawmna nei tho left-wing student organisation SFI te pawhin an chhuah tur thu an sawi bawk a. Hei bakah hian Kerala Pradesh Congress Committee (KPCC), Youth Congress te pawh telin an chhuah tur thu an sawi bawk.
Kerala Pradesh Congress Committee (KPCC) te chuan documentary chu Republic Day ah district headquarter tinah an chhuah tur thu an puang bawk a.
BJP te chuan party dangte hmalakna chu ‘inphatsanna’ tia sawiin Kerala Chief Minister chu inrawlh tura ngenin chhuah a nih loh theih nana hma la turin an ti nghal bawk.
BJP state president K Surendran chuan Vijayan hnenah documentary chhuah a nih loh nan ngenna lehkha theh lutin Surendran chuan documentary chhuah a nih chuan ram dang tena India inunauna leh inngeihna derthawngah an siamna tih nen inhen a ni, a ti.
Hei mai bakah hian kum sawm hnih kaltaa thil thleng tawh tharthawh leh vak tumna chu ‘sakhuana lam boruak tha lo chhem alh tumna’ tiin a sawi bawk.
Union Minister of State for External Affairs and Parliamentary Affairs V Muraleedharan pawhin Chief Mnister chu an State chhunga he documentary chhuah hi phal lo turin a ngen bawk a.
Muraleedharan chuan Supreme Court-in a hnawl tawh inpuhna tharthawh leh tumna chu Supreme Court zahlohna a ni, a ti bawk.
SFI te chuan Facebook post an siamah documentary chu State-a college campus hrang hrangah chhuah a ni ang an ti thung a.
State Youth Congress president Shafi Parambil chuan inphatsanna leh mihring suatna te thuneihna hmangin thup reng theih a ni lo, BBC documentary hi Kerala-ah chhuah a ni ang tiin a sawi.
KPCC minority cell chairman, advocate Shihabuddin Karyat pawhin thuchhuah a siamah documentary chu Republic Day ah party district headquarter tinah chhuah a ni ang tiin a sawi bawk.
Centre chuan he documentary hi kar kalta khan YouTube leh Twitter ah te post khapin link share na te pawh paih zel a ni a.
He BBC documentary hi hlawm hniha then niin PM Modi Gujarat CM a nih laia kum 2002 Gujarat riot chungchang chhui chianna a ni a. Ministry of External Affairs chuan ‘propaganda piece’ tia sawiin leh ‘colonial mindset’ lantirna tiin a sawi.
Social media te atanga chhuah khapna hi Ministry of Information and Broadcasting chuan kar kalta Zirtawpni khan IT Rules, 2021 hmangin a lo kalpui tawh a.
Sorkar laipuiin he documentary tihchhuah a khap hian sawisel hlawh hlein Congress leh Trinamool Congress Party te chuan centre-a BJP sorkar chu ‘censorship’ kalpuiah an puh a ni.