Kerala vaukama Liberian lawng chesualin khuarel tihchhiat hlau
Liberian bungraw phur lawng, mihring tana hlauhawm tak container 13 tela container 640 phur chu Kerala vaukamah a letin a pil zui tih thuneituten an sawi a, a chuangte chu chhanchhuah theih ni mah se khuarel a tihchhuah hlauhna a lian hle.
“May 25 hma takah khan MSC ELSA 3 chu 09°18.76’N 076°08.12’E-a a awm laia letin a pil,” tiin Indian Coast Guard (ICG) chuan Pathianni khan thu a chhuah.
Thawktu zinga mi pathum chu kalsan an ni a, INS Sujata chuan Inrinni zan atang khan puiin an chhanchhuak zui thei hlauh.
ICG chuan tuipui tibawlhhlawh thei vennaa thuam lawng, Saksham chu tirh nghal niin tuialhthei bua a awm pawha veng turin an ti tih a sawi.
Container 640 a phurh zinga 13 chu mihring tana him lo a ni a, heng zinga 12 hi calcium carbide a ni tih an sawi bawk.
“Lawngah hian a tuialhthei bawmah diesel MT 84.44 leh furnace oil MT 367.1 a awm bawk,” tiin ICG chuan a puang.
Kerala tuipui kamah hian tuia cheng chi nungcha tam tak an awm bakah khualzin tlawh nasat hmun a ni a. Hei vang hian a bawlhhlawha nungchate huat zawng a darh hlauh a ni a, ICG chuan chutiang a thlen loh nan chuan hma an la a, state sorkar nen pawh a theih ang angin an thawk ho niin a sawi.
“Tuipuia tuialhthei bua hre thei leh chhuia buaipui thei ICG thlawhna tirh chhuah tawh a ni a. Bua chu a awm ngei tin finfiah tawh a ni,” an ti.
Indian Navy leh ICG hian lawng chesual ta hi hnuh sawn tumin an bei nghal mek bawk.
Defence PRO chuan lawng neitu company pawhin a hmun hi thleng tawhin Indian thuneitute nen thil kalpui zel dan turah an inrawn zel tih a puang.
A hmain thuneitute chuan thawktu mi 24 zinga 21 chu chhanchhuah an ni tih an puang a, pathum chu a neitu company thupekin lawngah hian awmtir rih an ni tih puan a ni.
Chhanchhuah hna thawhnaa bultumtu ber, ICG leh Indian Navy lawngten a bul hnaiah awmpuiin an vil reng.
Kerala State Disaster Management Authority (KSDMA) chuan mipuite chu tuipui kamah lawng lian atanga put tuialhthei leh thil dangte chu khawih miah lo turin hriattirna an tichhuak tawh.
Mipuite hi vaukamah lawng tuialhthei nia ngaih an hmu a nih chuan police hnena hriattir vat turin an ti bawk.
Metre 184-a sei MSC ELSA 3 hi Zirtawpni khan Vizhinjam lawngchawlhna atangin Kochi pana chhuak a ni a. Inrinni chhun dar 1.25 vek khan lawng neitu company chuan Indian thuneitute hnenah hmanhmawh taka puih an ngaih thu an hrilh.
ICG chu an lawng leh thlawhna nen an thawk chhuak zui a. Thawktu 24 zinga mi Russian (Master) pakhat, Filipino 20, Ukrainian pahnih leh Georgian pakhat an chhan chhuak.
ICG chuan lawng hian Marine Gas Oil (MGO) leh Very Low Sulphur Fuel Oil (VLSFO) te pawh a phur tih an sawi.
Kerala vaukama Liberian lawng chesualin khuarel tihchhiat hlau
