Keys kutah major title lut ve ta nge nge

Keys kutah major title lut ve ta nge nge
Inrinni zan Australian Open women’s singles final-ah rinkai zawk leh defending champion ni bawk Aryna Sabalenka laka 6-3, 2-6, 7-5 hnehna changin kum 29-a upa ni tawh Madison Keys chuan a career-a a Grand Slam title hmasaber a sualchhuak ve ta hram a, professional era-a Grand Slam champion ni thei upat dan indawta a palina a ni pha.
Kum 11 liamta khan kum 31 mi ni tawh chungin Chinese player Li Na khan Australian Open singles title hi lain, professional era-a he title hawn thei upa ber a ni a, kha mi dawta upa leh ber chu Keys hi a ni.
Top seed Sabalenka tan a zawna Melbourne Park lallukhum vawithum khum zawn thei nih a tumna a thlawn ta a ni.
Daphne Akhurst Memorial Cup chawi chungin 19th seed Keys chuan tah a chak thu a sawichhuak a, Melbourne-a a Grand Slam semi-final hmasaber a lo paltlang tawh bawk avangin Australian Open khelhna hmun chu a home ang maia a ngaih thu leh final-a a han chak leh zel chu a tan khawvel hi a parmawi chheng ni bera a ngaih thu a sawi!
Belarusian Sabalenka hnehtu American Keys kha 2009 French Open title latu Russian Svetlana Kuznetsova hnu lama major tournament pakhata world number one leh two hneh chunga trophy la leh thei hmasaber a nih rualin Melbourne Park bikah pawh kum 20 kaltaa champion Serena Williams hnu lama chuti ang hlawhtlinna lhu bik chang leh thei hmasaber a ni nghal bawk.
Keys hi 2017 US Open final-ah khan a chipui Sloane Stephens hneh loin a tlawm a, kha mi hnu khan major tournament-ah reng reng quarter-final leh semi-final paltlang a harsat chho ta tlat a, kumin erawh a dan a dang ta daih a, a career-ah mellung pawimawh a phun ve ta nge nge a ni.
“He thil hi ka duhna a rei tawh a, Grand Slam final chu tunhmain vawikhat lo khel ve tawh mah ila ka ban phak lohah a tawlhbo a, ka chan turin a rawn tawlh hnai leh ang tih pawh ka hre phak tawh lo a, mahse, ka team-te’n ka lakah rinna an nghat tlat a, kei tak phei chuan ka beisei ngam tawh lo a,” tiin major title lak kawnga a beidawn hman rum rum thu a sawichhuak.
Grand Slam-a tlawm zen zen lo Sabalenka pawh a chak lo zo sehsam zualpui a reh hnu chuan interview hmachhawn turin a nui leh thei ta a, “Madison, wow, he tournament zet chu i ta a ni e.
“He trophy hawn tur hian theihtawp tak meuh i chhuah a, in phu ang ngeiin nang leh i team-te ka lawmpui a che u. Hlim takin champion lawm mawlh rawh u.
“Kumin chu he trophy hi hum zo ta lo mah il a khawng zawkin ka lo kir leh dawn a, nakkumah chuan ka tennis tha ber ka rawn phawrh tawh ang,” title hum zo ta lo Sabalenka chuan a ti.