Punjabi tlangval, Gurdaspur khua a cheng Kuwar Amritbir Singh chuan a kutzungtang chauh hmanga innem khalh chunga push up tiin, a hnungzangah kg 20 a rit ak chungin minute khatah push up vawi 86 a tihman a, Guinness World Record a siam a, Guinness chuan hetiang record siam thei hmasa ber a nih thu an puang nghal bawk. Kuwar hian March ni 7 khan record siam tum hian a bei a, July ni 25-ah email-in a record chu pawm a nih thu Guinness World Record atangin a dawng a, August ni 17 khan Guinness atangin official certificate a dawng ta a ni.
Kuwar chuan hetiang record siam hmasa bertu nih chu inchhuanna tham ni a a hriat thu a sawi, hetiang record siam a tum tan dan sawiin, Guinness World Record hrang hrang en kualnaah kutzungtang chauha innem khalh chunga minute khata push up tihnem record a hmu a, chuta tang chuan kutzungtang chauha hnungzangah kg 20 a rit ak chunga push up record siam ve a rilruk ta niin a sawi, nikum February atang khan inbuatsaih tan ta a ni.
Kuwar hi record siamah a mikhual tawh bik lo a, kum 17 mi chauh a nih laiin minute khatah knuckle push up vawi 118 tihmanin World Records of India a siam, 2020 khan second 30 chhunga superman push up vawi 35 tihmanin, India Book of Records-ah a hming a lo chuantir tawh bawk a ni.
Kuwar hi a danglamna pakhat chu tleirawl chhuah hlim atanga fitness lama tui a ni a, mahse, gym-ah a kal ngai lo va, taksa tihchakna lam chi pawh engmah a ei ngai lo. Ama tawhin gym a siam chawp a, brick leh buara bag chhunga vaivut thun khah leh plastic bur cement a chhun khah te a hmang ve mai thin a ni.
Kg 20 ak chunga kut zung\ang hmanga push up tiin record siam
