Mi awmthei leh mahni khamkhawp buhfai ei theite buaipui lam niloin, mirethei, an chanvo tur ang chang pha lo hmaih palh an awm ang tih chu sawrkar hlauh ber leh an thupui ber a ni tih Supply minister B Lalchhanzova chuan a sawi.
Thawhtannia ZPM party office-a inkhawmah minister B Lalchhanzova chuan, Aizawl khawpuiah ration card 73110 a awm a, hetah hian mi 312125 an inziaklut a. Card eng (AAY) ah mi 9129 awmin, card 3286 a awm a; card pawlah mi 135178 awmin ration card 31965 a awm. Card varah mi 167746 awmin ration card 37831 a awm tih a sawi.
Tunah hian Aizawla veng 83-ah retailer 153 an awm mek a, Food Security Committee-in a zirchiang ang a, DCSO kaltlangin Food Security Committee an dik tawk em tih anni’n an lo zirchiang ve leh dawn tih a sawi a ni.
India sawrkarin kum 2011 chhiarpui angin Mizorama chhungkua 706296 chu Food Security Act hnuaiah min rinlut a, Aizawl khawpuiah card var nei si, mirethei tak tak an awm avangin Food Security Committee kaltlangin endik hna an kalpui a, an tum ber chu mi awmtheite leh mahni khamkhawp buhfai ei theite buaipui lam niloin, mirethei, sawipuitu nei lo, an chanvo tur ang chang pha lo hmaih palh an awm ang tih an hlau a, chu chu an thupui ber a ni tih B Lalchhanzova hian a sawi.
“Mirethei hlamchhiah an awm em, tih chu kan thupui ber a ni dawn. A titha lo veng an awm em, tih thlengin kan enfiah dawn. A teh dan tur pawh kan duangfel vek tawh a. A ti tha lo veng leh titha veng kan puang hial maithei. Rethei ngaihsaktu party kan nihna hi he ration card thlan hmang hian lantir kan tum a, ngaihsaktu nei ve loten ZPM rei tak atanga min lo nghah chhanna tur a ni,” a ti.
Retailer lawmman pawh duli (paise 50) atangin Rs.1.50 ah an tisang dawn a, Aizawl bikah chuan hei hi October atangin hman an tum tih FCS&CA minister hian a sawi. “Retailer-ten an buk dik tur a ni a, buk dik zalenna ram nih kan tum,” a ti.
Khamkhawp buhfai ei theite niloin, mirethei hmaih palh loh kan tum ber – B Lalchhanzova
