Mizoram chak lakluhna kawngpui, Kawnpui leh Khamrang inkar dinhmun chu adviser to CM (Finance & Technical) TBC Lalvenchhunga, MLA hoin Mizoram PWD hotute leh NHIDCL hotute chuan Ningani khan a hmunah an en a; a thawmthat hna thawh mek chu chak lehzuala kalpui tum a ni.
Adviser to CM hi NHIDCL executive director thar Adelbert Susngi leh technical director Amarender Kumar ten an tawiawm a. Mizoram PWD atangin CE Highway Robin Lalrinawma leh SE Highway Circle-I Eddie Zothansanga ten tawiawmin, kawng chhia thawmthat hna thawh mekah chak taka hmalakna kalpui a ni a, khawl leh hmanrua leh thawktute a theih anga tam indah tum a ni.
Adviser to CM hian NHIDCL hotute chu darkar 6 danah an hmalakna report pe turin a ti a. Harsatna an neih pawh sawrkar thuneitute hnena thlen hreh lo tur leh rang taka hma lakpui nghal zel an nih tur thu a hrilh a ni.
Kawnpui leh Khamrang inkar kawng chhia thawmthat hna thawh mekah hian NHIDCL contractor chuan excavator 6 bakah road roller pakhat leh motor grader pakhat an inchhawp a, Nilaini zan atang khan Mizoram PWD chuan zan lama lirthei tang buaipui turin exvacator 3 an chhawp bawk.
Helai kawngpui siam mek a nih avang hian chhun lamah Aizawl pan lirthei chu Kawnpui daiah leh Kawnpui lam pan chu Khamrangah dan an ni a, zan lamah chhuah thin an ni.
Khamrang kawng siam mekCM adviser-in a awmchilh
