Congress President Mallikarjun Kharge chuan Parliament House pahniha Prime Minister Narendra Modi thusawi te chu ‘thusawi satliah’ tia sawiin Opposition tena zawhna an neih pakhatmah a chhang lo tiin a sawi.
Congress President chuan Parliament House pahniha Prime Minister thusawi te chu ‘chapona’ tia sawiin inflation, unemployment leh Adani Group chungchang te chu sawilanna a nei hauh lo a ti bawk a.
Kharge chuan rupee hlutna a tlahniam mek zel a, primary school 71,000 chuang kharin a awm tawh a, private educational institution te an pung zel a, ram pumah private school a pung a, hengah te hian Prime Minister in engmah chhanna a pe lo tiin a sawi.
“PM Modi hian amah chauhin ram a chhanhim thei tiin a sawi chu chu chapona a ni” tiin Rajya Sabha a Leader of Opposition chuan a sawi bawk.
Rajya Sabha-a President address motion of thanks debate neihnaah PM Modi chuan Congress leader te chu India Prime Minister hmasa ber Jawaharlal Nehru hnathawh pawimawh te nuaireh tumah a puh a.
Opposition party te thung chuan Hindenburg-Adani Group chungchang chu joint parliamentary committee chhui chian an phut thung a ni.
PM Modi chuan thusawina a neihah sorkar scheme 600 chuang te chu Nehru-Gandhi family hming puttir an ni a ti a. “Mi thenkhat ten sorkar scheme hmingah leh Sanskrit thumal hmanah harsatna an nei a. Report ka chhiarah sorkar scheme 600 chuang te chuan Gandhi-Nehru family hming an chawi a ni. Ka hriatthiam theih loh chu tun huna thangthar tena Nehru surname an hmang duh lo chu a ni a, eng nge an hlauh a, eng nge an zahpui” tiin PM Modi chuan a sawi a.
Prime Minister chuan Congress te chu an rorel laia State sorkar te namthlu thinah a puh bawk a. Hei bakah hian Opposition party thenkhat tena Old Pension Scheme hman leh an duh zawk thu an sawi laiin PM Modi chuan economy chungchang a sawi bawk a.
Party te chuan ngaihdan in ang lo an neih thu sawiin mahse ram economic hriselna chu politics thila kailut lo turin a ngen thung a.
“Politis leh ideology lamah kan ngaihdan a in ang lo thei a, party te pawh inmillohna a awm thei a, mahse, ram economic hriselna hi chu khawih loh tur a ni. In fate rights laksak thei thil sual tisuh u” tiin PM Modi chuan a sawi.