Khatla TBL dal thei an awm lo
Super saturday hmawrbawkna Hlutea kut!
June ni 14, inrinni khan Mizoram Basketball Association (MBBA) buatsaih season opening finals hmuhnawm bik chhawpchhuahin a awm a, Mizoram basketball-ah thil thleng lian a awm – club lian leh lar, chak chiang saa ngaih awm thin kha thai bo a ni.
MBBA hnuaia division pathum – Mizoram Super League (MSL), D League leh Women’s League finals-ah beisei phak bakin team an intluk tawk!
Khatla TBL point 1-in chak hram!
Chanmari BC in hma an hruai char char a, hun tawp dawnah Khata TBL jersey no 7 Hlutea kiangah an captain |hazuala ball hloh a rawn sawt a, he nau hian rang taka chharin a shoot nghal – a lut, hun a tawp zui! TBL in 76 – 75 in Chanmari BC an vel!
Khatla TBL hi MSL X finalist an ni a, tun inelna final-ah hian tlawm nawn an tum lo tih an captain |hazuala, kum 26, a vanglai hun hmang mek tanzia enin a hriat.
Ani hian hun pawimawhah point a nei mawlh mawlh a, point 33 lai a nei!
Tualchhung basketball hrechiang an head coach Mapuia leh asst. coach Richard-ate’n Emmanuel-a awm lo mah se Johan-a an ring tawk a, ani hian point 14 a nei.
Khel chhe lo Miller-a leh Johan-a hi boruak sangah an zaidam loh nawn fo chuan team boruakin a chhiat phah hun a thleng ang – an la naupang a, insum theih an mamawh.
He inkhelah hian ‘The Revd.’ Chuaua a khel tha tak zet a, TBL fapa rangkachak hian point 11 a thawkchhuak. Defense-ah a tangkai hle, minute tam zawk chan a phu tih a phochhuak.
Transfer season a thawm nei lian ber Chanmari BC tan an vanduai dan kha ‘champion rih lo tura duan’ a ang hle.
An head coach Lana’n game a vil hneh a, hun tawp lama Reuben-a a la chhuak lo erawh kha a mak! Player tuan tha leh che rang Samson-a hi game thlakthleng hlawk tur khawpa theihna nei a ni a, bungraw hlu tak pindan chhungrila khuh bo daih ang maia dah hmuar atan chuan uiawm tak a ni.
He team hi insengkhawm thar ni mah se Rozama (27 points) erawh a tal na nghal hle.
Big Mike (18 points) pawh player tha zualte zingah a hming lam rik ni thei tawh tur khawpin a khel tha tulh tulh.
Chanmari BC hi an la nghet tawk rih lo a, ball keng thei, keng rei mah mah an la intodelh deuh bawk.
Chutih rualin, team insawhnghet tawh Zarkawt BCA hnehtu leh Khatla TBL barakhaih thei khawpin hun rei lote chhungin an inremkhawm hman a, hun an la mamawh belh a ni e.
MSL club pariat zingah semi-final lut pha lo, Tuikual South-in player langsar nei lo mah se – Atluanga leh Robs Tlaute an bazar thiam hle.
Mission Veng Hotshots-in an player pawimawh chhawr theih loh an neih te, Chhinga Veng BC-in Afela kaihhruaina hnuaia tan an la tharte leh Saron BC inkhel thlir khan Mizo player-te an intluk tawk hle tih a lang.
Zemabawk BC leh Zarkawt BCA tan lah club intihsiakna a awl rih vang vang dawn a, inbuatsaihna hun a tam hle!
D league leh Women’s league lamah inkhel hmuhnawm zet karah Vanguard BC leh Bungkawn LBA-te’n champion nomawi an hawn bawk.
Hoops Mania Time Out
MBBA 2025 calendar thlir vang vangin programme inchherchhuan a kuh tul.
Season opening a zo va, July thla tirah Inter Veng tournament a awm zui leh nghal dawn.
Chumi zawhah chuan August atangin inter school inelnain a hmuak lehnghal pang a, October thlaah inter district tournament a ni zui leh ang.
` Thla li (4) zet club lam tan intihsiakna erawh a awm dawn lo thung!
November thlaa MBBA Cup khelh tur inbuatsaihna ‘holiday’ MBBA hnuaia club 19-te’n an nei tihna a ni.
Khatla TBL dal thei an awm lo Super saturday hmawrbawkna Hlutea kut!
