Khauh zawka ILP pek dan hman kan phut – MIMA
Sumdawng pawl intelkhawm chuan inner line permit pek dan leh a hnu zela umzui kawngah khirh leh khauh zawka kalpui turin sawrkar an phut tih an sawi.
Mizoram Merchant Association (MIMA) thuchhuak chuan, tunlai hian Mizoramah hnamdang (Vai) an lo lut nasa hlein a hria a, thenawm Assam sawrkarin an state-a Bangladeshi awmte chhuak tura a tih avangin Mizoramah lo luh an tum an tamin a ring tih a sawi a. Tunah pawh Mizoram kawtchhuah, Vairengte lamah ILP siamna hmun a lun hle nia hriat a ni tih a sawi.
‘Mizote hi kan la tam loin, sumdawnna kawngah phei chuan chimral kan la sam hle dawn a. Mizote min hung bikna ILP hi khirh leh khauh takin sawrkarin lekkawh se MIMA chuan a duh a ni,’ a ti.
ILP sponsor-tu leh a diltu phone number leh address dik tak ziaha proof thlap bawk, rang leh felfai zawka ILP tihfel sak an nih theihnan a tul anga thawktu dah belh, hnamdang sponsor-tuten an sponsor-te permit a tawp hnua thawn haw chu an mawhphurhna a ni tih hriat thar a, an mamawh tawh loh huna se zawl chhuah mai loin an sponsor-na lehkha copy chu an chenna local/ village council a thehlut ngei tura ti turin sawrkar leh a sponsor-tu a phut tih a sawi a ni.
MIMA chuan National Highway 306/06 a chhiat em avang leh a siam buai laia lirthei tangkhang tam lutuk chu pawi a tih thu a sawi a. Kumin August 23-a a hmuna an enfiahnaah, kawng a chhiat em avanga truck driver tam takin Mizorama tlan an hreh em em a, a tlan duh chhunte pawh an tlanna rate a sang a, chu chuan thil phurh man a nghawnga thil a to ta niin a sawi. Mipuiin an tawrh avangin sawrkar chu kawng tha neih theihnan chak taka hma la turin a phut tih a sawi a ni.
Hnamdang (Vai) leh foreigners lo lut, dan loa sumdawng an tam ta hlea a hriat avangin MIMA chuan heng mite list hi siam a tum tih a sawi bawk.
Khauh zawka ILP pek dan hman kan phut – MIMA
