India rama khaw lum ber thla tih thin April-ah hian mithiamte chuan chawhma dar 11 leh tlai dar 4 inkarah pawna chhuak tam lo turin mipui an hriattir thin.
Heti khawpa khua a lum tak siah chuan zirlai naupang tenawi zual, elementary chin hi chu khaw lum nasat zual lai hi chuan chawlhtir emaw, an class timing her danglam emaw, uniform tel lova summer dress nena kaltir mai emaw thlenga ruahmanna siam rih mai a that a rinawm. Hma lam hun hriat a ni lo va, khua hi a lum chho zel a nih phei chuan zingkar lama class neihtir mai pawh a la tul thei awm e. Eng pawh ni se, khaw awm dan thlir chungin thuneituten zirlai naupang zualte dinhmun ngaihven zual thei se a duhawm hle a. Khawlum avanga dehydration thleng thei a nih avangin, rehydration lam inzirtir ngun a pawimawh hle bawk awm e.
A kum telin khua a lum chho hret hret a, ‘kumin chu’ kan ti kumtin thin a; kumin 2023 zet chu a tawrhhlehawm zual ta niin a lang.
Pathianni khan kum danga thleng ngai zen zen lo a thleng a. Mumbai khawpui chhunga sawrkar huaihawt mipui punkhawmnaa tel mi 10 chu khawlum kaihhnawihah an thi a, mi engemawzat damdawi ina enkawl ngai an awm bawk a. Sawrkar chuan thi chhungte hi cheng nuai nga pein damdawi ina dahte pawh a thlawn veka enkawl turin a ti nghal a ni.
Khawlum chhan hi chu kan hriat angin, sawi tam vak ngai lovin boruak tha siamtu thing leh mau kan tihchereu nasat luat tawh vang bakah, lirthei pung nasa ta lutukin ‘khawl khu’ a siam hnem ve tawh vang hrim hrim te, chumi belhchhahtu industry-a khawl thil kan hman nasat chhoh zel tak vang te pawh a ni ang a. Chutih laiin, dan kalha bawlhhlawh hal khuk lut lut kan la sim theih loh vang te pawh a ni thei vek tawh.
Hetiang khawlum kaihhnawiha buaina thleng thei laka mipui an him zawk nan health services lam pawhin nasa zawkin mipui zirtirna vawrh darh thei se a duhawm hle a ni.
Khaw lum leh zirlai naupang
![](https://theaizawlpost.org/wp-content/uploads/tap_logo-min-large.jpg)