Spain leh Portugal-a kang thelhtu sang rualin rim takin ram kang an thelh mek laiin khua nasa takin la lum belh turin an sawi lawk a, hei hian Iberian Peninsula-a harsatna lian zawk a thlen hlauhna a lian hle.
Spain lailiah kang thelhtu leh special military unit chuan zanah pawh chawl lovin Avila province chhung, a bikin Madrid atanga khawthlang lam km 100 vela hla, El Arenal khaw bula kang an thelh.
Khawthlang lama Caceres province-ah tual chhung thuneitute chuan hectare 2,500 vela zaua ram kang chu an thunun tawh tih an sawi thung a. Insaseng tura inhriattirna pawh an sut leh deuh vek tawh.
Portugal-ah an ram hmar lama ram kang chu a thelhtu 2,000 chuangin an buaipui mek.
Peninsula pum deuhthaw chu ram kang mai thei dinhmunah a ding mek a, kartawpah khua a lum belh dawn avangin hlauhthawnna a na zual hle.
Spain-a meteorology service AEMET chuan Pathianni hian an ram laili leh chhim lamah chuan 40°C a kai dawn niin an sawi lawk a. Portugal-ah pawh Inrinni hian 30°C chung lam deuh vek a ni dawn tih an sawi.
June thla lum ber kum ni mah se kum dang zawng aiin Spain-ah hian ram kang zau zawng a la tlem thung.
Europe hi khawvela khua a lum chakna ber niin kum 1980 chhova khawvel pum lumna let hnih vel a ni tawh niin European Union hnuaia Copernicus Climate Change Service chuan a sawi.
Scientist-te chuan sik leh sa inthlak nasa avangin khaw lum leh ro a nasa zual dawn niin an sawi lawk a, a bikin Europe chhimchhak chu nasa zual tur nia sawi niin ram pawh a kan duh phah dawn niin an ngai.
Ram kang hi mihringin a siam chhuah a ni fo bawk a. Ningani pawh khan Albanian thuneitute chuan ram an tikanga puhin mi 21 an man a, an ramah hian hmun 59-ah ram kangin hectare 29,000-a zau a tuam a ni.
Albania-a Interior Minister Arsen Hoxha chuan hmun tam zawka mi chu mihringin an tihkan a nih thu leh ruah a sur hlauh va, a tam zawk a mit tawh tih a sawi.
Khaw lum zual tur karah Spain leh Portugal-ah ram kang nasa
