Kumin March chhung khan Mizoram Police chuan khawchhak lam atanga tawlhluh ruihhlo chi hrang hrang, anmahni chhut danin cheng nuai 332 chuang hu an man.
Mizoram Police hotute sawi danin, 2026 March chhung khan Mizoram khawchhak lam district pathum (Eastern Range) – Champhai, Khawzawl leh Saitualah ruihhlo leh a kaihhnawih tam tham tak man a ni a. Hei hian ruihhlo beihna kawnga Mizoram Police hmalakna leh thawhrimna a tarlan rualin, nasa lehzuala ruihhlo do kawnga hma lak a tul zia a tarlang chiang tih an sawi a ni.
Ruihhlo leh dan phal loh thil do kawngah tha thlah loin Mizoram Police chuan theihtawp an chhuah zel dawn tih sawiin, ‘Ram leh hnam himna turin sawrkar, VC, YMA leh NGO hrang hrang tanghoin ruihhlo do beihpui kan thlaknaah neitu chan changa kan hnam hmelma lian tak hi min dopui turin Zoram mipui kan sawm a. Thuneitute hnena misual leh ruihhlo tawlh report kawngah tan la thar a, thahnemngai taka theihtawp min chhuahpui zel turin kan inngen a ni,’ an ti.
March thla chhung hian heng district pathuma police hian heroin kg. 5.15396 an man a, an hralhna rate anga chhutin Rs. 103,079,200 hu a ni. Hemi kaihhnawihah hian thubuai 9 ziahluh niin, mi 10 man zinga 6 chu India khua leh tui an ni a, a dang 4 hi ramdang mi an ni.
Hemi thla vek hian methamphetamine kg. 15.28 a rit an man a, a hlutna an chhut hi Rs. 122,120,000 a ni. Thubuai 3 ziahluh niin mi 5 man zinga 3 chu India mi, 2 ramdang mi an ni. Ganja kg. 5.519 an man a, mi pakhat hnen atangin niin, Rs. 275,950 hu niin an chhut. Morphine kg. 10.685 man a ni bawk a, Rs. 106,850,000 hua chhut niin, mi 2 (Indian) an man. An thil man hlutna belhkhawm hi Rs. 332,325,150 niin an chhut a ni.
Khawchhak atanga ruihhlo tawlhluh vbch. 332 hu man
