Khawchin thlirlawkna hotupa in
larsap hnenah an hnathawh hrilh
India Meteorological Department (IMD) hnuaia Meteorological Centre Aizawl director & head Sudheer Kumar Dwivedi chuan larsap Gen. Vijay Kumar Singh (Retd) chu Nilaini khan hmuin hma an lakna leh hmachhawp a sawipui.
Larsap chuan khaw awm dan tur hrilhlawk leh data pawimawh siam kawnga an hnathawh fakawm tiin, tih lara put darh zung zung theihnan line department leh media-te zau zawka thawhpui a, Mizo mipuiin tangkai taka an chhawr theihnan Mizo tawnga tarlan tum turin a chah. Mizorama radar bun thuai a nih theihnan hma la rang turin a chah bawk.
Meteorological Centre Aizawl hotu chuan an centre tihchangtlun kawnga larsap hmalakna leh thlawpna an dawn thin avangin lawmthu a hrilh.
Hma an lakna a sawi zingah, VVIP lo zin apianga an kalna tur hmuna khaw awm dan tur hrilhlawkna siam bakah ni 7 chhung atan zel Mizorama khaw awm dan tur hrilhlawkna siam, tourist hipna atan Aizawl Air Quality Index siam bakah Mizorama khualzinte kal tamna hmun pali thlan chhuaha khaw awm dan tur hrilhlawkna (tourist places forecast) siam leh darkar 6 kalta khaw awm dan kimchang, social media leh website kaltlanga tarlan a tel.
Hmachhawp an neih zingah, kumin chhung ngeia Mission Mausam hnuaia Doppler Weather Radar, Laipuitlang Aizawla bun, Mizorama cyclone tleh thin zinga zaa 90 chu chhimlam atanga lo thawk a nih avangin Siahaa Meteorological Office bun leh zirlaite tan Aizawl Meteorological Centre-a Training & Awareness Centre din a tel a. Heng bakah hian nakin zel atana lo inruahman lawknan Aerodrome Meteorological Station Lengpui chu tun aia changtlung zawk Aerodrome Meteorological Office (AMO) a hlankai an tum a ni.
Khawchin thlirlawkna hotupa inlarsap hnenah an hnathawh hrilh
