Khawhawi tinuam lotu siamtha dawn

Khawpui khaw hawi tithawveng lo zawnga sawrkarin hmun a ruahman danah Aizawl Hmathlir Pawl chuan hma la in, ruahman dan tih danglam a ni dawn.
State Bank of India Main Branch bul, Assam Rifles Quarter Guard epa Mahatma Gandhi lim dah thinna chu UD&PA department-in mipui chawlh hahdam theihna tura siam danglamin, brick hmanga a bang hung vek an tum nia hriat a ni, khawpui kawng dunga sawrkar ram, khaw hawi nuam leh thawveng zawnga siam a ni lo zel chu tha ti loin Aizawl Hmathlir Pawl hian UD&PA minister Pu K Sapdanga hmu in an duh dan an thlen a, minister ruahmanna in vawiin, October 6 khan he pawl hruaitute leh UD&PA lamin an enho.
Brick rem chin tih hniam a, concrete-a a chung nei tur pawh thiah leh a, fencing tih san chu an duhdan a ni tih thlenin, UD&PA engineer lamten thil tih theih tho a nih thu in an chhang a ni. An in saka coffee shop dah an tum pawh a hmunhma a chep avangin dah loh theih nise, tih chu pawm tlan a ni bawk.
Aizawl Hmathlir Pawl hian hmun hlui humhalh bakah Aizawl khawpui chu hun lo awm zel turah mihring tana chenna nuam leh hahdam a nih zel theih nan kawng hrang hrangin hma an la thin a ni.
Hetihlai hian helai hmuna Mahatma Gandhi lim dah thin chu siamthat a nih chhung hian Pachhunga University College campus, College Vengah Gandhi lim hi dah a ni a, PUC lam hian awm zui zel se an duh avangin sawrkar chuan MINECO Green Park-a dah tur Gandhi lim dang an siamtir a, dah theiha peihfel a ni tawh nia thu dawn a ni.