India ram khawpui lian – Delhi, Bangalore leh Kolkata-ah Mizo kutchhuak thil zawrhna ‘Made By Mizo’ dawr hawn tumin hma an an la a, an inbe mek tih Cooperation minister PC Vanlalruata chuan a sawi.
Mizoram Handloom & Handicrafts Development Corporation Limited (ZOHANDCO) chuan Chhuanthar Tlangnuamah Zirtawpni khan puantahna khawl (Zo loom) an sem rualin puantah kaihhnawiha hriat tur tul an zirtir a. Hmanpuitu Tuikum bialtu MLA, minister PC Vanlalruata chuan, Chhuanthar Tlangnuam mipui taimakna leh thawhrimna fakin, puantah lama hma an lakna turah pawh beiseina sang tak a nei tih a sawi a. Puana sumdawnna chu Mizoram economy chawinungtu pawimawh pakhat a nih thu leh, Mizo kutchhuak chawinung tura ZOHANDCO hmalakna lawmawm a tih thu a sawi a ni.
ZOHANDCO kaltlangin ram pawna Mizo kutchhuak puan leh thiamhnang deh chi hrang hrang zawrhchhuahna tur an zawng a; Delhi, Bangalore leh Kolkata-ah Mizo kutchhuak thil zawrhna dawr hawnin hma an la a, inbiak mek a ni tih a sawi bawk.
Mizo kutchhuak chawisan chu sawrkarin a ngaipawimawh a, ZOHANDCO hmalaknaa Chhuanthar mipui tana puantah khawl 9 sem a ni pawh lawmawm a tih thu bialtu MLA hian a sawi a ni.
Training hi thla khat chhung an nei phawt tur anga, mi 45 an tel dawn. A tirah chuan puan ban sa hmangin an zirtir anga, mi pahnih thlang chhuakin, puan ban, hnahchawi thil, reed thil leh tul dang zir belh turin Aizawlah training zawm tir leh tum a ni.
Khawpui pathumah Mizo kut chhuak zawrhna hawn kan tum – PC Vanlalruata
